अण्वस्त्रधारी उत्तर कोरियाकडून ३ सप्टेंबर रोजी हायड्रोजन बॉम्बची यशस्वी चाचणी केली आहे. हि उत्तर कोरियाची सहावी अणुचाचणी आहे.
या चाचणीच्या काही तासांपूर्वीच उत्तर कोरियाचे अध्यक्ष किम जोंग उन यांची हायड्रोजन बॉम्बसोबतचे छायाचित्र शेअर केले होते.
उत्तर कोरियाने चाचणी केलेला हायड्रोजन बॉम्बमध्ये अणुबॉम्बपेक्षा शंभर पट संहारक क्षमता आहे. हा बॉम्ब क्षेपणास्त्राद्वारे डागता येऊ शकतो.
उत्तर कोरियाने घेतलेल्या पाचव्या अणुचाचणीच्या तुलनेत आज झालेला स्फोट ९.८ पटीने अधिक शक्तिशाली होता.
जगातील प्रमुख देशांनी यासंबंधी चिंता व्यक्त केली आहे. अमेरिकेने उत्तर कोरियाची आर्थिक नाकेबंदी करण्याचा विचार सुरु केला आहे.
काही दिवसांपूर्वीच अमेरिकेचे राष्ट्राध्यक्ष डोनाल्ड ट्रम्प यांनी उत्तर कोरिया विरोधात लष्करी कारवाईचे संकेत दिले होते.
आयपीएल प्रक्षेपणाचे हक्क स्टार इंडियाला
‘स्टार इंडिया’ या कंपनीने सर्वाधिक १६ हजार ३४७ कोटी रुपयांची बोली लावत इंडियन प्रीमियर लीग (आयपीएल)च्या प्रक्षेपणाचे हक्क मिळवले आहे.
स्टार इंडियाकडे २०१८ ते २०२२ या पाच वर्षांसाठी इंडियन प्रीमियर लीगच्या टेलिव्हिजन आणि डिजिटल असे दोन्ही प्रक्षेपणाचे हक्क असतील.
भारतासह आफ्रिका, युरोप, अमेरिका, ऑस्ट्रेलिया, न्यूझीलंड या देशांमधील प्रक्षेपणाचे हक्कदेखील स्टारनेच मिळविले आहेत.
आयपीएलच्या मीडिया हक्कांची टेलिव्हिजन आणि डिजिटल अशा दोन माध्यमांमध्ये विभागणी करण्यात आली होती.
टेलिव्हिजन हक्कांसाठीच्या लिलावप्रक्रियेत सोनी, बी स्पोर्ट्स, सुपरस्पोर्ट, इको नेट, परफॉर्म ग्रुप अशा जगभरातील २४ नामांकित कंपन्यांनी सहभाग घेतला होता.
तर, डिजीटल हक्कांसाठी अमेझॉन, ट्विटर, डिस्कव्हरी, फेसबुक, एअरटेल यासारख्या दिग्गज कंपन्यांनी प्रयत्न केले.
मात्र टेलिव्हिजन आणि डिजिटल तसेच संपूर्ण भारत आणि जगभरातील सर्व मीडिया हक्क मिळवण्यात स्टार इंडियानेच बाजी मारली.
२००८मध्ये ‘सोनी’ने ८,२०० कोटी रुपयांमध्ये दहा वर्षांसाठी आयपीएलच्या टेलिव्हिजन प्रक्षेपणाचे हक्क घेतले होते.
त्यानंतर २०१५साली नोवी डिजिटलने ३०२.२ कोटी रुपये मोजून तीन वर्षांसाठी डिजिटल प्रक्षेपणाचे हक्क मिळविले होते.
शिल्पा अग्रवाल यांना मिसेस युनिव्हर्स लव्हली किताब
दक्षिण आफ्रिकेतील दरबान येथे झालेल्या मिसेस युनिव्हर्स स्पर्धेत महारष्ट्रातील प्रसिद्ध उद्योजिका शिल्पा अग्रवाल ‘मिसेस युनिव्हर्स लव्हली २०१७’ किताबाच्या मानकरी ठरल्या.
दरबान येथे २४ ऑगस्ट ते ३ सप्टेंबरदरम्यान मिसेस युनिव्हर्स किताबासाठी हि स्पर्धा पार पडली. ‘महिला सक्षमीकरणातून परिवर्तनाचा उदय’ अशी या स्पर्धेची थीम होती.
या स्पर्धेत जगभरातून २१ ते ४५ वर्षे वयोगटातील १८४ स्पर्धकांनी सहभाग नोंदविला होता.
अत्यंत प्रतिष्ठेच्या या स्पर्धेत शिल्पा अग्रवाल यांनी विविध फेऱ्यांमध्ये स्वत:च्या आकर्षक व्यक्तिमत्त्वाचा ठसा उमटविला.
त्या ‘मिसेस युनिव्हर्स लव्हली’ किताब पटकाविणाऱ्या मध्य भारतातील पहिल्या महिला ठरल्या आहेत.
अग्रवाल यांनी यापूर्वी थायलंडमध्ये झालेल्या मिसेस इंडिया वर्ल्ड वाइड स्पर्धेचा मिसेस इन्स्पिरेशनल किताब आपल्या नावावर केला आहे.
तसेच म्यानमारमध्ये झालेल्या मिसेस इंडिया ग्लोब २०१५ या स्पर्धेचे उपविजेतेपदही त्यांनी मिळविले आहे
याशिवाय त्यांनी २००४मध्ये ‘मिसेस नागपूर’ आणि पती आकाश अग्रवाल यांच्यासोबत २००५मध्ये ‘मि ॲण्ड मिसेस नागपूर’ किताब मिळविला आहे.
प्रसिद्ध उद्योजिका म्हणून प्रख्यात असलेल्या शिल्पा आकाश फर्निचर ग्रुपच्या व्यवस्थापकीय संचालक आणि मुख्य कार्यकारी अधिकारी आहेत. तसेच समाजसेवेच्या माध्यमातून त्या महिलांच्या उत्थानासाठी कार्यरत आहेत.
हेलिकॉप्टर्ससाठी एचएएलचा सरकारसोबत करार
हिंदुस्तान एरोनॉटिक्स लिमिटेड (एचएएल) भारतीय लष्कर आणि नौदलाला ४१ अत्याधुनिक हलकी हेलिकॉप्टर्स (एएलएच) पुरवणार आहे.
यासंदर्भात संरक्षण मंत्रालय आणि ‘एचएएल’ यांच्यामध्ये ६,१०० कोटी रुपयांचा करार करण्यात आला आहे. ६० महिन्यांसाठी हा करार लागू असेल.
मार्च २०१७मध्ये एचएएल कंपनीने ३२ ‘एएलएच’ हेलिकॉप्टर भारतीय नौदलाला आणि तटरक्षक दलाला पुरविले होते.
कोणत्याही टिप्पण्‍या नाहीत:
टिप्पणी पोस्ट करा