स्कॉर्पियन श्रेणीतील ‘आयएनएस करंज’चे जलावतरण
- स्कॉर्पियन श्रेणीतील तिसरी पाणबुडी ‘आयएनएस करंज’चे ३१ जानेवारी रोजी मुंबईच्या माझगाव डॉक येथून जलावतरण करण्यात आले.
- ‘प्रकल्प ७५’ अंतर्गत स्कॉर्पियन वर्गातील ६ पाणबुड्यांच्या निर्मितीचे काम माझगाव गोदी येथे सुरू आहे. या ६ पाणबुड्या २०२०पर्यंत नौदलात सामील करण्याचे उद्दीष्ट आहे.
- यापूर्वी याच श्रेणीतील पहिली पाणबुडी आयएनएस कलवरी आणि खांदेरी या पाणबुड्यांचे जलावतरण पार पडले होते.
- अत्याधुनिक तंत्रज्ञानाने सुसज्ज असणाऱ्या आयएनएस करंजमुळे भारतीय नौदलाचं सामर्थ्य वाढणार आहे.
- नौदलाचे चीफ अॅडमिरल : सुनील लांबा
ब्लड मून, सुपरमून आणि ब्लुमूनचा त्रिवेणी संगम
- खग्रास चंद्रग्रहण (ब्लड मून), सुपरमून आणि ब्लुमून असा दुर्मिळ तिहेरी नजराणा ३१ जानेवारी रोजी आकाशात पाहायला मिळाला.
- यावेळी चंद्र हा पृथ्वीपासून सुमारे ३.५८ लाख किमी अंतरावर आला. त्यामुळे नेहमीपेक्षा १४ टक्के मोठा तर ३० टक्के अधिक तेजस्वी दिसत होता.
- खगोल शास्त्रज्ञांनी याला ‘स्नो ब्लू सुपर रायझिंग, कॉपर टोटल लुनार एक्लिप्स’ असे नाव दिले आहे
- यापूर्वी ३१ मार्च १८६६ रोजी म्हणजेच १५२ वर्षांपूर्वी असा तिहेरी योग जुळून आला होता.
- २०१८नंतर ३१ जानेवारी २०३७ मध्ये ‘सुपर-ब्ल्यू-ब्लड मून’ पाहाण्याचा तिहेरी योग येणार आहे. २६ मे २०२१ रोजी सुपरमून आणि चंद्रग्रहण असा दुहेरी योग येणार आहे.
जगातील श्रीमंत देशांमध्ये भारत सहावा
- जगातील सर्वात श्रीमंत देशांच्या क्रमवारीत भारताने सहावा क्रमांक पटकावला आहे. भारतातील एकूण संपत्तीचे मूल्य ८,२३० अब्ज डॉलर इतके आहे.
- न्यू वर्ल्ड वेल्थ या संस्थेने तयार केलेल्या अहवालानूसार अमेरिका हा जगातील सर्वात श्रीमंत देश आहे. २०१७ साली अमेरिकेची एकूण संपत्ती ६४,५८४ अब्ज डॉलर इतकी होती.
- दुसरा क्रमांकावर असलेल्या चीनची एकूण संपत्ती २४,८०३ अब्ज डॉलर, तिसरा क्रमांक पटकाविलेल्या जपानची एकूण संपत्ती १९,५२२ अब्ज डॉलर आहे.
- या पाहणीसाठी प्रत्येक देशातील प्रत्येक व्यक्तीकडे असलेली स्थावर, जंगम मालमत्ता, समभाग, व्यावसायिक मत्ता आदी विचारात घेण्यात आल्या आहेत. मात्र, सरकारकडे असलेल्या निधीची रक्कम या मोजदादीतून वगळण्यात आली आहे.
- २०१६मध्ये भारताची एकुण संपत्ती ६५८४ अब्ज डॉलर होती. २०१७मध्ये ती ८२३० अब्ज डॉलर झाली. म्हणजे २०१७मध्ये भारताच्या एकुण संपत्तीत २५ टक्के वाढ झाली.
- भारतात अतिश्रीमंतांची (१० लाख डॉलर वा त्याहून अधिक संपत्ती असणारे) ३,३०,४०० आहे. अमेरिकेत हीच संख्या ५०,४७,००० आहे.
- भारतातील कोट्यधीशांची संख्या २०,७३० असून, अब्जाधीशांची संख्या ११९ आहे.
- जगातील अब्जाधीशांच्या यादीत अमेरिका आणि चीननंतर भारत तिसऱ्या क्रमांकावर आहे. तर कोट्यधीशांच्या यादीत भारत सातवा आहे.
| जगातील पहिले दहा श्रीमंत देश | ||
|---|---|---|
| क्र. | देश | संपत्ती (अब्ज डॉलर) |
| १. | अमेरिका | ६४,५८४ |
| २. | चीन | २४,८०३ |
| ३. | जपान | १९,५२२ |
| ४. | ब्रिटन | ९,९१९ |
| ५. | जर्मनी | ९,६६० |
| ६. | भारत | ८,२३० |
| ७. | फ्रान्स | ६,६४९ |
| ८. | कॅनडा | ६,३९३ |
| ९. | ऑस्ट्रेलिया | ६,१४२ |
| १०. | इटली | ४,२७६ |
यशवंत सिन्हा यांच्याकडून ‘राष्ट्र मंच’ची स्थापना
- पंतप्रधान नरेंद्र मोदी यांच्या नेतृत्वावर नाराज असलेले भाजपचे ज्येष्ठ नेते यशवंत सिन्हा यांनी नवीन राजकीय वाटचालीसाठी ‘राष्ट्र मंच’ची स्थापना केली आहे.
- यामध्ये भाजपचेच खासदार आणि अभिनेते शत्रुघ्न सिन्हा यांच्यासह इतर पक्षांचे नेतेही सहभागी झाल्याने राजकीय वर्तुळामध्ये खळबळ माजली आहे.
- केंद्रामध्ये नरेंद्र मोदी यांचे सरकार आल्यानंतर लालकृष्ण अडवाणी, यशवंत सिन्हा यांच्यासारख्या भाजपच्या जुन्या नेत्यांना बाजूला सारण्यात आले होते.
- यामुळे या नाराज नेत्यांनी मोदी सरकारच्या चुकीच्या धोरणांवर टीका करण्यास सुरुवात केली होती. यामध्ये शत्रुघ्न सिन्हा देखील आघाडीवर होते.
- यशवंत सिन्हा यांनी केंद्र सरकारच्या चुकीच्या धोरणांना विरोध करण्यासाठी ‘राष्ट्र मंचा’ची स्थापना केली आहे.
