प्रजासत्ताक दिनाच्या शुभेच्छा

 प्रजासत्ताक दिनाबद्दल 

• भारतात दरवर्षी २६ जानेवारी रोजी भारतीय प्रजासत्ताक दिवस राष्ट्रीय दिन म्हणून साजरा केला जातो. याला गणराज्य दिन असेही म्हटले जाते.
• संविधान समितीने २६ नोव्हेंबर १९४९ रोजी स्वीकारलेले भारताचे संविधान २६ जानेवारी १९५० पासून अंमलात आले.
• जवाहरलाल नेहरूंनी २६ जानेवारी १९३० रोजी लाहोर अधिवेशनात तिरंगा फडकावून पूर्ण स्वराज्याची घोषणा केली होती. त्याची आठवण म्हणून २६ जानेवारी हा दिवस राज्यघटना अंमला आणण्यासाठी निवडण्यात आला.
• २६ जानेवारी १९५० रोजी नव्याने स्वातंत्र्य मिळालेल्या भारत देशाने संविधान अंमलात आणून लोकशाहीतील एका नव्या पर्वाची सुरुवात केली होती.
• या दिवशी भारताची राजधानी, नवी दिल्ली येथे रायसीना हिलपासून राष्ट्रपती भवनापर्यंत राजपथ मार्गाद्वारे एक मोठी परेड (संचलन) निघते.
• संचलनाच्या अगोदर अनाम सैनिकांसाठी बनवले गेलेले स्मारक ‘अमर जवान ज्योती’ येथे भारताचे पंतप्रधान पुष्पचक्र अर्पण करतात. भारतासाठी आपले प्राण अर्पण करणाऱ्या वीर सैनिकांना श्रद्धांजली वाहण्यात येते.
• त्यानंतर देशासाठी शौर्य गाजवलेल्या सैनिकांना राष्ट्रपतींच्या हस्ते अशोक चक्र, कीर्ती चक्र, परमवीर चक्र हे मुख्य पुरस्कार देण्यात येतात.
• भारतीय फौजांचे (नौदल, पायदळ, वायुसेना) वेगवेगळे सेनाविभाग, घोडदळ, पायदळ, तोफखाना आणि इतर अद्ययावत शस्त्रे/क्षेपणास्त्रे, रणगाडे समवेत संचलन करतात. भारतीय राष्ट्रपती या फौजांची मानवंदना स्वीकारतात.
• या संचलनाबरोबरच भारतातील विविध संस्कृतींची झलक प्रस्तुत केली जाते. त्यासाठी भारतातील राज्ये आपापल्या राज्याचे चित्ररथ पाठवितात.
• या संचलनाप्रमाणेच भारतातील सर्व राज्यांतही संचलन होते. प्रत्येक राज्यात त्या त्या राज्याचे राज्यपाल फौजांची मानवंदना स्वीकारतात.
• स्वतंत्र भारताचे पहिले राष्ट्रपती डॉ.राजेंद्र प्रसाद यांच्या उपस्थितीत १९५० साली दिल्ली येथे राजपथावर पहिले संचलन आयोजित करण्यात आले. भारताच्या ‘विविधतेतून एकता’ या वैशिष्ट्याला ही मानवंदना होती.

 प्रमुख अतिथी 

• १९५०पासून भारताच्या प्रजासत्ताक दिनाच्या सोहळ्यासाठी प्रमुख अतिथी म्हणून दरवर्षी दुसऱ्या देशाच्या राष्ट्रप्रमुखाला बोलावण्याची प्रथा आहे.
• यंदाच्या ६९व्या प्रजासत्ताक दिनासाठी आसिआन संघटनेतील देशांचे प्रतिनिधी (खालीप्रमाणे) प्रमुख अतिथी म्हणून उपस्थित राहात आहेत.
• सुलतान हसनल बोल्काय (अध्यक्ष, ब्रुनेई)
• ह्युन सेन (पंतप्रधान, कंबोडिया)
• जोको विडोडो (राष्ट्राध्यक्ष, इंडोनेशिया)
• थाँगलून सिसूलिथ (पंतप्रधान, लाओस)
• नजीब रजाक (पंतप्रधान, मलेशिया)
• आंग सान सू की (स्टेट कौन्सीलर, म्यानमार)
• रोड्रिगो रोआ ड्युआर्टे (राष्ट्राध्यक्ष, फिलिपाइन्स)
• ली ह्यसीन लूंग (पंतप्रधान, सिंगापूर)
• प्रायुथ चान ओचा (पंतप्रधान, थायलंड)
• न्ग्युएन झुआन फुक (पंतप्रधान, व्हीएतनाम)

यापूर्वीचे प्रमुख अतिथी
वर्ष	प्रमुख अतिथी	देश
१९५०	राष्ट्रपती सुकर्णो	इंडोनेशिया
२०११	राष्ट्रपती सुसिलो बांबांग युधोयोनो	इंडोनेशिया
२०१२	पंतप्रधान यिंगलक शिनावत	थायलंड
२०१५	राष्ट्रपती बराक ओबामा	अमेरिका
२०१६	राष्ट्रपती फ्रान्स्वॉ ओलांद	फ्रान्स
२०१७	राजपुत्र शेख मोहम्मद बिन झायेद अल नाह्यान	संयुक्त अरब अमिराती