चालू घडामोडी : २ व ३ एप्रिल
गतिमान एक्स्प्रेस सेवेसाठी सज्ज
- देशातील सर्वांत वेगवान ‘गतिमान एक्स्प्रेस’चे ५ एप्रिल रोजी अधिकृत उद्घाटन होणार आहे. ताशी १६० किलोमीटर हा या रेल्वेचा कमाल वेग असेल.
- ‘गतिमान एक्स्प्रेस’ सर्वप्रथम दिल्लीतील हजरत निजामुद्दीन ते आग्रा कॅंटोन्मेंट या मार्गावर धावणार आहे. अर्थात, नंतर या रेल्वेचे वेळापत्रक बदलले जाणार आहे.
- दिल्ली आणि आग्रा अंतर जवळपास २०० कि.मी. आहे. एवढे अंतर ही गाडी अवघ्या १०० मिनिटांत पार करणार आहे.
- या रेल्वेला बारा वातानुकूलित डबे असतील. त्यात स्वयंचलित दरवाजे, वाय-फाय अशा सुविधाही असतील. या प्रवासाचे भाडे ‘शताब्दी एक्स्प्रेस’पेक्षा जास्त असेल.
- ही गाडी शुक्रवार वगळता आठवड्यातील सहाही दिवस धावणार आहे. शुक्रवारी ताजमहल बंद असतो. त्यामुळे या दिवशी ही गाडी बंद ठेवण्यात आली आहे.
- येत्या काळात कानपूर-दिल्ली, चंदिगड-दिल्ली, हैदराबाद-चेन्नई, नागपूर-बिलासपूर, गोवा-मुंबई आणि नागपूर-सिकंदराबाद अशा नऊ मार्गांवरही ‘गतिमान एक्स्प्रेस’ सुरू करण्याच्या प्रस्तावावर रेल्वे मंत्रालय काम करत आहे.
मसूद अझरवरील बंदी चीनने टाळली
- पाकिस्तान पुरस्कृत दहशतवादी संघटना ‘जैश-ए-मोहम्मद’चा म्होरक्या मसूद अझरवर बंदी घालण्याचा भारताचा प्रस्तावावर चीनने नकाराधिकाराचा वापर केला.
- ‘यूएन’च्या सुरक्षा परिषदेत भारताच्या प्रस्तावावर चर्चा आणि मतदान होणार होते, मात्र चीनच्या विरोधामुळे दहशतवादी अझरवरील बंदी लांबणीवर पडली.
- पठाणकोट येथे भारतीय हवाई दलाच्या तळावर जानेवारीत दहशतवादी हल्ला झाला होता. या हल्ल्याचा संबंध जैश आणि जैशचा म्होरक्या अझरशी असल्याचे ठोस पुरावे भारताने ‘यूएन’पुढे सादर केले.
- हे पुरावे मिळाल्यामुळेच ‘यूएन’ने अझरवरील बंदीच्या प्रस्तावावर सुरक्षा परिषदेत चर्चा करण्याचा निर्णय घेतला होता.
- मात्र चर्चा सुरू होण्याच्या काही तास आधीच चीनने प्रस्तावाला विरोध करण्यासाठी नकाराधिकार वापरणार असल्याचे जाहीर केले आणि चर्चा बारगळली.
- चिनी नकाराधिकारामुळे अमेरिका, फ्रान्स, रशिया आणि इंग्लंडचे समर्थन असूनही प्रस्तावावर चर्चा झाली नाही.
- नियमानुसार, सुरक्षा परिषदेत अमेरिका, फ्रान्स, रशिया, इंग्लंड आणि चीन या ५ देशांकडे नकाराधिकार आहे. यातील एका देशाने जरी नकाराधिकार वापरला तरी सुरक्षा परिषद प्रस्ताव बाद करते. याच नियमाचा गैरफायदा घेत पाकने चीनकरवी दहशतवादी अझरवरील बंदी टाळली.
- याआधी २००१ मध्ये सुरक्षा परिषदेने दहशतवादी संघटना ‘जैश-ए-मोहम्मद’वर बंदी घातली.
- मुंबईत झालेल्या २६/११च्या दहशतवादी हल्ल्यानंतर २००८ मध्ये जैशचा म्होरक्या मसूद अझरवर बंदी घालण्याचा प्रस्ताव चर्चेसाठी सादर केला होता. मात्र चीनने नकाराधिकार वापरुन हा प्रस्ताव बाद केला होता.
- आता पुन्हा एकदा नकाराधिकाराचा वापर करुन चीनने दहशतवादी अझरवरील बंदी टाळली आहे.
दहशतवादाविरोधात अमेरिका आणि सौदी अरेबिया एकत्र
- पाकिस्तानातील दहशतवादी संघटना आणि व्यक्तींवर निर्बंध आणण्यासाठी अमेरिका आणि सौदी अरेबियाने हातमिळवणी केली.
- अमेरिका आणि सौदी अरेबियामधील करारानुसार पाकिस्तानातील दहशतवादी संघटना लष्कर-ए-तोएबावरही निर्बंध येणार आहेत.
- अलकायदा, तालिबान आणि लष्कर-ए-तोएबाचा निधी रोखून त्यांचे जाळे मोडण्यासाठी अमेरिका आणि सौदी अरेबिया संयुक्तपणे कारवाई करणार आहेत.
कोणत्याही टिप्पण्‍या नाहीत:
टिप्पणी पोस्ट करा