चालू घडामोडी : ६ फेब्रुवारी
नाना पाटेकर यांना ‘गोदावरी गौरव’ पुरस्कार
- कुसुमाग्रज प्रतिष्ठानतर्फे देण्यात येणाऱ्या ‘गोदावरी गौरव’ पुरस्कार चित्रपट क्षेत्रासाठी अभिनेते नाना पाटेकर यांना जाहीर झाला.
- याशिवाय मुंबईच्या कनक रेळे (नृत्य), साताऱ्याच्या चेतना सिन्हा (लोकसेवा), मुंबईचे डॉ. शशिकुमार चित्रे (विज्ञान), नाशिकचे डॉ. हितेंद्र महाजन व डॉ. महेंद्र महाजन (क्रीडा), अहमदाबादचे बाळकृष्ण दोशी (वास्तुशिल्प) हे पुरस्कारांचे मानकरी ठरले आहेत.
- २१ हजार रुपये रोख व स्मृतिचिन्ह असे या पुरस्काराचे स्वरूप आहे. १९९२पासून गोदावरी गौरव पुरस्कारांचे वितरण केले जाते. हे पुरस्कार द्वैवार्षिक आहेत.
अमेरिकेचे अंतराळवीर मिशेल यांचे निधन
- अमेरिकेतील अंतराळवीर एडगर मिशेल (वय ८५) यांचे अल्प आजाराने फ्लोरिडा येथे निधन झाले.
- अमेरिकेची अंतराळ संस्था ‘नासा’च्या चांद्रमोहिमेत मिशेल सहभागी झाले होते. १९७१मध्ये ‘अपोलो १४’ यानातून ऍलन शेफर्ड (ज्युनिअर) व स्टुअर्ट रोसा या अंतराळवीरांबरोबर मिशेल चंद्रावर पोचले होते.
- आतापर्यंत चंद्रावर पाऊल ठेवलेल्या १२ अंतराळवीरांपैकी मिशेल एक होते. त्यांच्या चांद्रस्वारीला ४ फेब्रुवारी रोजी ४५ वर्षे पूर्ण झाली.
- ‘अपोलो १४’च्या चांद्रमोहिमेत सहभागी अंतराळवीरांपैकी हयात असलेले मिशेल हे शेवटचे होते. रोसा यांचे १९९४ मध्ये; तर शेफर्ड यांचे १९९८ मध्ये निधन झाले.
- त्यांनी अनेक पुस्तके लिहिली असून, त्यात ‘द वे ऑफ एक्स्प्लोरर’चा समावेश आहे.
‘आयपीएल-९’साठी खेळाडूंचा लिलाव
- इंडियन प्रीमियर लीगच्या नवव्या सत्रासाठी झालेल्या लिलावात ऑस्ट्रेलियाचा अष्टपैलू खेळाडू शेन वॉटसनला सर्वाधिक ९.५ कोटींची बोली लावून बंगळुरूने खरेदी केले.
- युवराजला ७ कोटींमध्ये सनरायझर्स हैदराबादने, तर पवन नेगीला ८.५ कोटींत दिल्ली डेअरडेव्हिल्सने खरेदी केले.
- न्यूझीलंडचा आक्रमक फलंदाज मार्टिन गुप्तिल, द. आफ्रिकेचा हाशिम आमला, ऑस्ट्रेलियाचा जॉर्ज बेली, मायकेल हसी, भारताचा चेतेश्वर पुजारा यांना बोली प्रक्रियेत खरेदीदार मिळाला नाही.
- आयपीएल बोलीत ३५१ खेळाडूंवर बोली लागली. यात आठ फ्रँचायझी टीमने ९४ खेळाडूंना खरेदी केले. या मोसमासाठी सहा फ्रॅंचाईजींकडून १०१ खेळाडू कायम ठेवण्यात आले आहेत.
हेल्मेटसक्तीचे आदेश जारी
- अपघाताची तीव्रता टाळण्यासाठी दुचाकी वाहनचालक व त्याच्या मागे बसून प्रवास करणारा अशा दोघांसाठी हेल्मेट वापरणे अनिवार्य करण्यात आली आहे.
- मुंबई उच्च न्यायालयाच्या २००३मधील एका आदेशानुसार मोटार वाहन कायदा १९८८च्या कलम १२९ नुसार हा निर्णय घेण्यात आला आहे. राज्याच्या परिवहन आयुक्त कार्यालयाने हे आदेश जारी केले.
- उच्च न्यायालयाच्या आदेशाची अंमलबजावणी करणे शासनास बंधनकारक आहे. यासाठी दुचाकी खरेदी करतेवेळीच उत्पादक दोन हेल्मेट ग्राहकाला देतील असे निर्देशही परीवहन आयुक्तांनी दिले आहेत.
- वाहन नोंदणी अधिकाऱ्यानेही वाहनाच्या कागपत्रांसोबत ग्राहकाला दोन हेल्मेट देण्यात आल्याची खातरजमा करावी असे निर्देश देण्यात आले आहेत.
गुजरात भूखंड वाटप प्रकरण
- नरेंद्र मोदी गुजरातचे मुख्यमंत्री असताना तत्कालीन महसूलमंत्री आनंदीबेन पटेल यांची कन्या अनार पटेल यांच्या व्यावसायिक भागीदारांना २५० एकर सरकारी जमीन स्वस्तात दिल्याचे प्रकरण समोर आले आहे.
- गिरच्या अभयारण्याशेजारी असलेली ही जागा ‘वाईसवुल्ड्‌स रिसॉर्ट ऍण्ड रिऍलिटिज प्रा. लि.’ला केवळ १५ रुपये स्क्वेअर फूट म्हणजेच ६० हजार रुपये एकर या दराने दिल्याचे उघडकीस आले आहे.
- गुजरात राज्य सरकारकडून आपण कोणताही लाभ घेतलेला नाही, असे स्पष्ट करून अनार हिने काँग्रेसने केलेल्या आरोपांचे जोरदार खंडन केले आहे.
१.२५ लाख ट्विटर अकाउंट ब्लॉक
- मायक्रो ब्लॉगिंगमधील आघाडीची वेबसाइट असलेल्या ट्विटरने दहशतवादाशी संबंधित असलेली १.२५ लाख अकाउंट ब्लॉक केली आहेत.
- यापैकी बहुतांश अकाउंट इस्लामिक स्टेट्स या दहशतवादी संघटनेशी संबंधित असून, त्यावरून धमकी देण्याचे; तसेच दहशतवादाचा पुरस्कार करण्यात येत असल्याचे ट्विटरने स्पष्ट केले आहे.
- ट्विटरच्या माध्यमातून भारतामध्ये दहशतवाद पसरवण्याचा प्रयत्न करणाऱ्या संघटना व व्यक्तींच्या अकाउंटवर मात्र वेबसाइटतर्फे कोणतीही कारवाई करण्यात आलेली नाही.
- ट्विटर दहशतवादाचा स्पष्टपणे निषेध करत असून, ट्विटर अकाउंटवरून दहशतवादाचा प्रसार करणे किंवा हिंसक कारवायांची धमकी देणे याला वेबसाइटची परवानगी नाही.
कोणत्याही टिप्पण्‍या नाहीत:
टिप्पणी पोस्ट करा