पुदुच्चेरीचे दहावे मुख्यमंत्री व्ही. नारायणसामी
- कॉंग्रेसचे वरिष्ठ नेते आणि माजी केंद्रीय मंत्री व्ही. नारायणसामी यांनी ६ जून रोजी पुदुच्चेरीच्या मुख्यमंत्रिपदाची शपथ घेतली. व्ही. नारायणसामी हे पुदुच्चेरीचे दहावे मुख्यमंत्री ठरले.
- लेप्टनंट गर्व्हनर किरण बेदी यांनी नारायणसामी आणि त्यांच्या मंत्रिमंडळातील पाच सदस्यांना पदाची आणि गोपनीयतेची शपथ दिली.
- मंत्रिमंडळात ए. नमाशिवायम, एम. कंदासामी, एच.ओ.एच.एफ. शजाहन, आर. कमलाकन्नन आणि मल्लादी राव यांचा समावेश आहे.
- तीस सदस्यीय पुदुच्चेरी विधानसभेत कॉंग्रेस आघाडीचे १७ आमदार आहेत. त्यात कॉंग्रेसच्या १२ आमदारांचा समावेश आहे.
- नारायणसामी हे यूपीएच्या दुसऱ्या सरकारमध्ये पंतप्रधान कार्यालयाचे राज्यमंत्री होते, तर यूपीएच्या पहिल्या सरकारमध्ये संसंदीय कार्य राज्यमंत्री होते.
- पुदुच्चेरीत १६ मे रोजी झालेल्या विधानसभा निवडणुकीत नारायणसामी रिंगणात नव्हते. आता त्यांना पोटनिवडणुकीतून निवडून यावे लागेल. त्यासाठी कॉंग्रेसच्या एखाद्या नवीन आमदाराला आपल्या पदाचा राजीनामा द्यावा लागेल.
जोकोविचचे करिअर ग्रँडस्लॅम पूर्ण
- जागतिक क्रमवारीतील प्रथम मानांकित सर्बियाच्या नोव्हाक जोकोविच याने द्वितीय मानांकित ब्रिटनच्या अँडी मरेचे कडवे आव्हान ३-६, ६-१, ६-२, ६-४ असे परतवून कारकिर्दीत प्रथमच फ्रेंच ओपन चॅम्पियनचा बहुमान मिळवला.
- पहिला सेट ३-६ ने गमावल्यानंतर जोकोविचने शानदार पुनरागमन करत हा सामना जिंकून करिअर ग्रँडस्लॅमही पूर्ण केले. यापूर्वी फ्रेंच ओपनमध्ये त्याला २०११, २०१४ आणि २०१५ ला उपविजेतेपदावर समाधान मानावे लागले होते.
- जोकोविचने आता सहा ऑस्ट्रेलियन, तीन विम्बल्डन, दोन यूएस ओपन आणि एक फ्रेंच ओपन विजेतेपदांसह एकूण १२ ग्रँडस्लॅम पटकावले आहेत.
- जोकोविच सर्वाधिक ग्रँडस्लॅम जिंकण्याच्या यादीत ऑस्ट्रेलियाच्या रॉय एमरसनसोबत तिसऱ्या स्थानी आहे. त्याच्या पुढे पीट सॅम्प्रास, नदाल (प्रत्येकी १४ ग्रँडस्लॅम) आणि फेडरर (१७ ग्रँडस्लॅम) आहेत.
- टेनिसविश्वात चारही मानाच्या ग्रँडस्लॅम जिंकून करिअर स्लॅम पूर्ण करणारा नोव्हाक जोकोविच आठवा खेळाडू ठरला. १९३५ मध्ये ब्रिटनचे दिग्गज फ्रेड पेरी यांनी सर्वप्रथम करिअर ग्रँडस्लॅम पूर्ण केले.
- त्यानंतर डॉन बज (अमेरिका), रॉड लेवर (ऑस्ट्रेलिया), रॉय एमर्सन (ऑस्ट्रेलिया), आंद्रे अगासी (अमेरिका), रॉजर फेडरर (स्वित्झर्लंड), राफेल नदाल (स्पेन) आणि त्यानंतर नोव्हाक जोकोविच यांनी करिअर ग्रँडस्लॅम पूर्ण केला आहे.
| नोव्हाक जोकोविचची ग्रँडस्लॅम जेतेपदे | |
|---|---|
| ऑस्ट्रेलियन ओपन | २००८, २०११, २०१२, २०१३, २०१५, २०१६ |
| फ्रेंच ओपन | २०१६ |
| विम्बल्डन | २०११, २०१४, २०१५ |
| अमेरिकन ओपन | २०११, २०१५ |
भारत आणि कतारदरम्यान सात करार
- कतारमधून हवाला रॅकेटमार्फत भारतात होणाऱ्या बेकायदा अर्थपुरवठ्याला तसेच दहशतवाद्यांना होणाऱ्या अर्थपुरवठ्याला यापुढे चाप बसविण्यासाठी भारत आणि कतारदरम्यान महत्त्वपूर्ण करारावर स्वाक्षऱ्या करण्यात आल्या.
- पंतप्रधान नरेंद्र मोदी हे सध्या कतारच्या दोन दिवसीय दौऱ्यावर असून त्यांच्यात व कतारचे आमिर शेख तामिम बिन हमाद अल थानी यांनी यावेळी सात विविध करारांवर स्वाक्षऱ्या केल्या.
- हे करार प्रत्यक्षात येण्यापूर्वी उभय देशांच्या अधिकाऱ्यांमध्ये तसेच या दोन नेत्यांमध्ये विस्तृत चर्चा झाली.
- दहशतवादांचे पाठिराखे व तसेच दहशतवादी कारवाया करण्यासाठी पैसे पुरवणाऱ्या गुन्हेगारांना एकटे पाडण्याच्या आवश्यकतेवर उभय देशांचे एकमत झाले.
- हवालामार्फत येणारा पैसा तसेच दहशतवाद्यांना होणारा अर्थपुरवठा रोखण्यासाठी उभय देशांच्या गुप्तहेर यंत्रणांनी परस्परांना माहिती पुरवावी, यावरही या बैठकीत शिक्कामोर्तब झाले.
- या बैठकीपूर्वी मोदी यांना येथील राजशिष्टाचारानुसार मानवंदना देण्यात आली.
मिस्टर युनिव्हर्स मनोहर ऐच यांचे निधन
- बॉडीबिल्डर व माजी मिस्टर युनिव्हर्स मनोहर ऐच यांचे वृद्धापकाळामुळे कोलकाता येथे निधन झाले. ते १०४ वर्षांचे होते.
- अवघी ४ फूट ११ उंची असलेल्या ऐच यांनी १९५२मध्ये मिस्टर युनिव्हर्सचा मान पटकावला. १९५१मध्ये पार पडलेल्या मिस्टर युनिव्हर्स स्पर्धेत त्यांना दुसऱ्या क्रमांकावर समाधान मानावे लागले होते.
- भारतीय वायुदलात काम करणाऱ्या ऐच यांनी ३० व्या वर्षी म्हणजेच १९४२ साली वेट लिफ्टिंग करण्यास सुरूवात केली आणि त्यानंतर दशकभराने त्यांनी 'मिस्टर युनिव्हर्स'चा खिताब जिंकला.
- मनोहर ऐच यांनी ‘पॉकेट हर्क्युलिस’ असे संबोधण्यात येत असे. मनोहर यांनी तीनवेळा एशियन गेम्समध्ये सुवर्णपदकही जिंकले. त्यांचा शेवटचा बॉडी बिल्डिंग शो २००३ साली झाला होता.
डॉ. एलिनॉर झेलिएट यांचे निधन
- भारतातील, विशेषत: महाराष्ट्रातील दलित आणि बौद्ध धम्म चळवळीच्या महत्त्वाच्या अभ्यासक, प्रसिद्ध अमेरिकन लेखिका, विदुषी डॉ. एलिनॉर झेलिएट यांचे अमेरिकेत निधन झाले. त्या ८९ वर्षांच्या होत्या.
- डॉ. एलिनॉर झेलिएट या डॉ. बाबासाहेब आंबेडकरांच्या कार्यकर्तृत्वाने भारून आंबेडकरांच्या नेतृत्वातील अस्पृश्योद्धाराच्या चळवळीच्या अभ्यासासाठी स्वत:ला वाहून घेतलेल्या विदुषी म्हणून प्रसिद्ध होत्या.
- अमेरिकेतील मिनेसोटातील कार्लटन कॉलेजमध्ये त्या दक्षिण भारताचा इतिहास हा विषय शिकवत होत्या. झेलिएट यांची भारत तसेच अमेरिकेत भारतातील दलित चळवळीच्या महत्त्वाच्या अभ्यासक आणि भाष्यकार म्हणून मान्यता आहे.
- दलित चळवळ, भारतातील मध्ययुगीन कालखंडातील संतकवी आणि डॉ. बाबासाहेब आंबेडकरांच्या विचारधारेवर आधारित सध्याची बौद्ध धम्मचळवळ अशा विषयांवर त्यांनी ८० लेख आणि ३ ग्रंथांचे संपादन केले आहे.
- वसंत मून यांचे आत्मचरित्रही डॉ. झेलिएट यांनी संपादित केले आहे. त्यांच्या या कार्यामुळे पहिले दलित आत्मचरित्र अमेरिकेत नेण्याचे श्रेय डॉ. झेलिएट यांनाच जाते.
एनएसजी गटासाठी स्वित्झर्लंडचा भारताला पाठींबा
- अणुसाहित्य पुरवठादार गटाचे (एनएसजी) सदस्यत्व भारताला मिळण्यासाठी स्वित्झर्लंडने पाठिंबा दिला आहे. या गटाची बैठक होण्याआधी स्वित्झर्लंडने पंतप्रधान नरेंद्र मोदी यांच्या दौऱ्यात हा पाठिंबा जाहीर केला आहे.
- अणुसाहित्य पुरवठादार गटात भारताला सदस्यत्व मिळावे यासाठी आमचा पाठिंबा आहे असे स्वित्झर्लंडचे अध्यक्ष जोहान स्नायडर-अम्मान यांनी सांगितले.
- भारताने या सदस्यत्वासाठी १२ मे रोजी अर्ज केला आहे. त्यावर व्हिएन्नामध्ये ९ जून व सोल येथे २४ जून रोजी बैठकांत चर्चा होणार आहे. एकूण ४८ सदस्य देश या गटात आहेत.
- काही भारतीय लोकांचा काळा पैसा स्विस बँकांत असून त्याला आळा घालण्यासाठी उपाययोजना करण्याचे तसेच, व्यापार, गुंतवणूक व व्यावसायिक प्रशिक्षण या क्षेत्रात सहकार्य करण्याचेही दोन्ही देशांनी मान्य केले.
कोणत्याही टिप्पण्‍या नाहीत:
टिप्पणी पोस्ट करा