निवडणूक आयोगाने तृणमूल काँग्रेसला ‘राष्ट्रीय पक्ष’ म्हणून मान्यता दिली आहे.
राष्ट्रीय पक्ष म्हणून मान्यता मिळण्यासाठी एखाद्या पक्षाला किमान चार राज्यांमध्ये राज्यस्तरीय पक्ष म्हणून मान्यता मिळालेली असणे आवश्यक आहे.
निवडणूक चिन्हे (आरक्षण आणि वितरण) आदेश १९६८मधील ही एक अट तृणमूल काँग्रेसने पूर्ण केली आहे.
तृणमूल काँग्रेस हा सध्या पश्चिम बंगाल, मणिपूर, त्रिपुरा व अरुणाचल प्रदेशामधील मान्यताप्राप्त राज्यस्तरीय पक्ष आहे.
आता भाजप, काँग्रेस, बहुजन समाज पक्ष, भारतीय कम्युनिस्ट पक्ष, मार्क्सवादी कम्युनिस्ट पक्ष, राष्ट्रवादी काँग्रेस आणि तृणमूल काँग्रेस हे सात मान्यताप्राप्त राष्ट्रीय पक्ष झाले आहेत.
एखाद्या पक्षाला राष्ट्रीय किंवा राज्य पक्ष म्हणून मान्यता मिळाल्यास, या पक्षाचे निवडणूक चिन्ह देशभरातील कुठल्याही निवडणुकीत इतर कुणाला वापरता येत नाही.
इतर नोंदणीकृत, मात्र मान्यताप्राप्त नसलेल्या राजकीय पक्षांना अनेक ‘मुक्त चिन्हांमधून’ निवडणूक चिन्हाची निवड करावी लागते.
भारत आणि इजिप्त दरम्यान सहकार्य करार
आंतरराष्ट्रीय शांतता आणि सुरक्षेला सर्वांत मोठा धोका असलेल्या दहशतवादाचा सर्व पातळ्यांवर सामना करण्यासाठी भारत आणि इजिप्त यांनी दोन्ही देशांमधील सहकार्य आणखी मजबूत करण्याचा निर्णय घेतला.
पंतप्रधान नरेंद्र मोदी आणि इजिप्तचे अध्यक्ष अब्देल फतह अल सीसी यांच्या दरम्यान झालेल्या चर्चेमध्ये परस्परांमधील सुरक्षा सहकार्य वाढविण्याचा निर्णय घेतला गेला.
इजिप्त हा देश ईशान्य आशिया तसेच पश्चिम आशियामधील एक महत्त्वाचा दुवा आहे.
दोन्ही देशांनी सुरक्षा व्यापार, प्रशिक्षण तसेच क्षमतानिर्माण वाढविण्याच्या निर्णयांसह अन्य अनेक क्षेत्रांतील संबंधांना चालना देण्यासाठी सहमती दर्शविली.
दोन्ही देशांनी व्यापारी तसेच वाणिज्य संबंधही भक्कम करण्याचा निर्णय घेतला.
नरेंद्र मोदी एकदिवसीय व्हिएतनाम दौऱ्यावर
पंतप्रधान नरेंद्र मोदींच्या व्हिएतनाम दौऱ्यात दोन्ही देशांमध्ये संरक्षण, माहिती व तंत्रज्ञान अशा विविध क्षेत्रातील १२ करारांवर स्वाक्षरी करण्यात आली.
व्हिएतनामचे अध्यक्ष ट्राम दाई क्वांग, पंतप्रधान गुयेन जुआन फुक आदी नेत्यांनी मोदींशी चर्चा केली.
संरक्षण सहकार्यांतर्गत व्हिएतनामला ५० कोटी डॉलर्सचे कर्ज देण्याची घोषणाही मोदींनी केली. १५ वर्षामधील भारतीय पंतप्रधानांचा हा पहिलाच व्हिएतनाम दौरा आहे.
दक्षिण चीन समुद्रावरुन व्हिएतनाम चीनमध्ये सुरु असलेल्या संघर्षाच्या पार्श्वभूमीवर या दौऱ्याला महत्त्व प्राप्त झाले आहे.
हनोई येथे ३ सप्टेंबर रोजी सकाळी नरेंद्र मोदींचे भव्य स्वागत करण्यात आले. मोदींना व्हिएतनामच्या जवानांनी गार्ड ऑफ ऑनरही दिला.
व्हिएतनाम दौऱ्यानंतर मोदी चीनमधील हाँगझोऊ येथे रवाना होतील. हाँगझोऊ येथे ४ आणि ५ सप्टेंबर रोजी जी-२० परिषद पार पडणार आहे.
नवज्योतसिंग सिद्धूंचा ‘आवाज-ए-पंजाब’
भाजपचे बंडखोर नेते माजी खासदार नवज्योतसिंग सिद्धू यांनी ‘आवाज- ए-पंजाब’ या नव्या पक्षाची स्थापना करण्याचा निर्णय घेतला आहे.
पंजाबमधील आगामी विधानसभा निवडणुकीच्या पार्श्वभूमीवर सिद्धू यांच्या पक्षामुळे राजकीय समीकरणे आमूलाग्र बदलू शकतात.
भारतीय हॉकी संघाचे माजी कर्णधार परगतसिंग आणि बियांस बंधू यांच्या पुढाकाराने या पक्षाची स्थापना करण्यात येणार आहे.
जुलै २०१६मध्ये सिद्धूने भाजपमधून बाहेर पडत राज्यसभा खासदारकीचा राजीनामा दिला होता.
सिद्धूंसारखा नेता आम आदमी पक्षामध्ये यावा म्हणून अरविंद केजरीवालांनीही प्रयत्न सुरु केले होते.
‘आप’ने आपल्यालाच मुख्यमंत्रिपदाचा दावेदार करावे, अशी अट सिद्धू यांनी केजरीवालांना घातली होती.
याबद्दल एकवाक्यता न झाल्यामुळे त्याने नवीन पक्ष स्थापन करण्याचा निर्णय सिद्धू यांनी घेतला आहे.
स्पेस-एक्सच्या रॉकेटचा उड्डाणापूर्वी स्फोट
खासगी मालकीची अवकाश कंपनी असलेल्या ‘स्पेस-एक्स’च्या रॉकेटचा उड्डाणापूर्वी प्रक्षेपण तळावरच स्फोट झाला.
फ्लोरिडातील केप कॅनाव्हेराल येथील प्रक्षेपण तळावर २ सप्टेंबर रोजी ही घटना घडली.
या घटनेत फेसबुकचेही मोठे नुकसान झाले असून, त्यांच्या महत्त्वाकांक्षी प्रकल्पाचा भाग असलेला उपग्रह या स्फोटात भस्मसात झाला.
इस्राईलमध्ये संदेशवहनासाठी वापरण्यात येणारा फेसबुकच्या मालकीचा उपग्रह या रॉकेटच्या माध्यमातून अवकाशात सोडण्यात येणार होता.
उझबेकिस्तानचे राष्ट्रपती कारिमोव्ह यांचे निधन
उझबेकिस्तानचे राष्ट्रपती इस्लाम कारिमोव्हयांचे २ सप्टेंबर रोजी निधन झाले. ते ७८ वर्षांचे होते.
कडव्या इस्लामवादाचे विरोधक म्हणून ओळखले जाणारे कारिमोव्ह हे गेल्या २७ वर्षांपासून उझबेकिस्तानच्या राष्ट्रपतीपदी होते.
१९९१मध्ये सोव्हिएत रशियामधून बाहेर पडल्यावर कारिमोव्ह यांनी सत्ता काबीज केली होती.
सोव्हिएत रशियातून बाहेर पडण्यासाठी झालेल्या स्वातंत्र्य चळवळीचे नेतृत्वही कारिमोव्ह यांनी केले आहे.
कडव्या इस्लामवादाचे विरोधक असले तरी कारिमोव्ह हे स्वतः हुकूमशहा होते. त्यांच्या हुकूमशाही वृत्तीमुळे उझबेकिस्तानवर पाश्चिमात्य देशांनी निर्बंधही घातले होते.
सत्तेवर आल्यापासून कारिमोव्ह यांनी त्यांच्या विरोधकांना तुरुंगात डांबून, तुरुंगात त्यांच्यावर अमानूष अत्याचारही केले होते.
कारिमोव्ह यांनी अमेरिकेविरोधातही कणखर भूमिका घेतली होती. स्वातंत्र्य आणि लोकशाहीच्या नावाखाली अमेरिकेने उझबेकिस्तानच्या अंतर्गत प्रश्नांमध्ये लुडबूड करु नये असे खडे बोल त्यांनी सुनावले होते.
कोणत्याही टिप्पण्‍या नाहीत:
टिप्पणी पोस्ट करा