चालू घडामोडी : ८ एप्रिल
युनोच्या शांतिदूतपदी मलाला युसूफझाई
- सर्वात तरुण नोबेल पुरस्कार विजेती मलाला युसूफझाईची युनोच्या शांतिदूतपदी निवड करण्यात आली आहे.
- जगातील एखाद्या नागरिकास संयुक्त राष्ट्राकडून देण्यात येणारा हा सर्वोच्च सन्मान असून, संयुक्त राष्ट्राचे महासचिव एंटोनियो गुटेरेस यांनी मलालाच्या नावाची घोषणा केली.
- मलालाच्या हातून लहान मुलींच्या शिक्षणाच्या प्रसाराचे कार्य वाढावे या हेतूने हा पुरस्कार देण्यात येत आहे.
- पाकिस्तानमध्ये शिक्षणाचा प्रसार करणाऱ्या मलालाला तालिबानच्या दहशतवाद्यांकडून विरोध झाला होता. दहशतवाद्यांनी २०१२मध्ये तिच्यावर हल्ला करत तिला ठार करण्याचा प्रयत्नही केला.
- त्या हल्ल्यातून ती बचावली आणि पुन्हा आपले शिक्षण प्रसाराचे कार्य सुरू ठेवले. तिच्या या कार्याची दखल घेत तिला २०१४चा शांततेचा नोबेल पुरस्कार देण्यात आला.
- तिच्यासह भारताच्या कैलाश सत्यार्थींनादेखील हा पुरस्कार देण्यात आला होता. हा पुरस्कार स्वीकारणारी मलाला जगातील सर्वात तरुण व्यक्ती ठरली.
- मलाला युसूफझाईने मलाला फंड या ट्रस्टची स्थापना केली आहे. त्याद्वारे ती जगभरात शिक्षणाचा प्रसार करते.
- आपले अनुभव कथन केलेल्या तिच्या 'आय एम मलाला' या पुस्तकाच्या आतापर्यंत १८ लाख प्रतींची विक्री झाली आहे.
व्हिटसन सर्वाधिक काळ अवकाशात राहण्याचा विक्रम करणार
- अमेरिकेच्या पेगी व्हिटसन या सर्वाधिक काळ अवकाश स्थानकात राहणाऱ्या अमेरिकी अवकाशवीराचा मान पटकावणार आहेत.
- एप्रिलअखेरीस हा विक्रम त्या नोंदवणार आहेत. याचे कारण म्हणजे त्यांचा अवकाशातील मुक्काम नासाने तीन महिन्यांनी वाढवला आहे.
- व्हिटसन यांनी नोव्हेंबर २०१६मध्ये ओलेग नोव्हिटस्की व थॉमस पेसक्वेट यांच्यासह रशियाच्या सोयूझ अग्निबाणाच्या मदतीने अवकाश स्थानकाकडे झेप घेतली होती.
- त्यांचे अवकाश वास्तव्य जूनमध्ये संपणार होते, त्यानुसार पेसक्वेट व नोव्हिटस्की हे परतही येणार आहेत; पण व्हिटसन यांचा मुक्काम मात्र वाढला आहे.
- अवकाश स्थानकात राहणाऱ्यांची संख्या रशियाने कमी करण्याचे ठरवल्यामुळे पेगी यांना ही संधी मिळाली आहे.
- येत्या २४ एप्रिलला पेगी व्हिटसन या अवकाश वास्तव्याचे ५३४ दिवस पूर्ण करणार आहेत. त्यामुळे त्या जेफ विल्यम्स यांचा विक्रम मोडणार आहेत.
- पुरुष व स्त्री अशा सर्वच अवकाशवीरांत रशियाचे गेनाडी पडालका यांचा अवकाश वास्तव्याचा विक्रम ८७९ दिवसांचा आहे.
- व्हिटसन आंतरराष्ट्रीय अवकाश स्थानकातील पहिल्या अमेरिकी कमांडर आहेत व २००८नंतर आता पुढील आठवडय़ात दुसऱ्यांदा स्थानकातील चमूचे नेतृत्व करणार आहेत.
- त्यांनी दुसऱ्या कुठल्याही महिलेपेक्षा जास्त स्पेसवॉक केले असून येत्या काही महिन्यांत त्या आणखी स्पेसवॉक करून त्यातही विक्रम करतील.
- यापूर्वी त्यांनी २००२ व २००७मध्ये त्यांनी दोन प्रदीर्घ अवकाश वास्तव्य मोहिमा केल्या आहेत. २०१६मधली आताची त्यांची तिसरी मोठी मोहीम आहे.
एल अँड टीच्या सीईओपदी एस एन सुब्रमण्यन
- अभियांत्रिकी क्षेत्रातील आघाडीचा समूह असलेल्या लार्सन अ‍ॅण्ड टुब्रोच्या मुख्य कार्यकारी अधिकारीपदी (सीईओ) एस एन सुब्रमण्यन यांची नियुक्ती झाली आहे.
- सुब्रमण्यन यांच्याकडे १ जुलैपासून व्यवस्थापकीय संचालकपदाचीही जबाबदारी असेल. सध्या ते समूहात उप व्यवस्थापकी संचालक व अध्यक्ष आहेत.
- ते १९८४मध्ये समूहात रुजू झाले व २०११मध्ये त्यांचा कंपनीच्या संचालक मंडळात सहभागी झाले.
- गेल्या १७ वर्षांपासून समूहाचे नेतृत्व करणारे यापूर्वीचे सीईओ ए एम नाईक यापुढे बिगर कार्यकारी अध्यक्ष म्हणून कार्यरत राहणार आहेत.
- गेल्या ५२ वर्षांपासून लार्सन अ‍ॅण्ड टुब्रोमध्ये असलेले नाईक १९९९मध्ये कंपनीचे मुख्य कार्यकारी अधिकारी व व्यवस्थापकीय संचालक बनले. तर २००३मध्ये ते समूहाचे अध्यक्ष झाले.
- आता बिगर कार्यकारी अधिकारी म्हणून १ ऑक्टोबरपासूनचा त्यांची कारकीर्द पुढील तीन वर्षांसाठी असेल. नाईक ३० सप्टेंबर २०१७ रोजी निवृत्त होणार आहेत.
- नाईक यांच्या १७ वर्षांच्या कालावधीत समूहाचे बाजार भांडवल ४,४०० कोटी रुपयांवरून १.५८ लाख कोटी रुपयांवर पोहोचले आहे.
- ३० देशांमध्ये कार्यभार असलेल्या लार्सन अ‍ॅण्ड टुब्रोचे भारताव्यतिरिक्त अन्य भागातील हिस्सा ३० ते ३५ टक्के आहे.
कान्स फिल्म फेस्टीवलसाठी ३ मराठी चित्रपटांची निवड
- कान्स फिल्म फेस्टीवलसाठी राज्य सरकारकडून तीन मराठी चित्रपटांची निवड करण्यात आली आहे.
- कान्ससाठी पाठवावयाच्या तीन चित्रपटांची निवड करण्यासाठी समिती स्थापन करण्यात आली होती. या समिती सदस्यांनी १६ चित्रपटांमधून ३ चित्रपटांची निवड केली.
- कान्ससाठी निवड करण्यात आलेल्या ३ चित्रपटांचे प्रत्येकी २ प्रतिनिधी असे एकूण ६ प्रतिनिधी महोत्सवासाठी पाठविण्यात येणार आहेत. १७ ते २८ मे दरम्यान कान्स फिल्म फेस्टीवल होणार आहे.
- निवड करण्यात आलेले तीन चित्रपट पुढीलप्रमाणे:-
- हॅपी माईंडस एंटरटेंमेंट प्रा. लि. निर्मित: सायकल
- एस पी इंटरटेंनमेंट प्रा. लि. निर्मित: टेक केअर गुड नाईट
- रंगनील क्रिएशन्स निर्मित: दशक्रिया
बांगलादेशला भारताकडून ४.५ अब्ज डॉलरचे अर्थसाह्य
- बांगलादेशमधील विविध विकासकामांसाठी भारताने ४.५ अब्ज डॉलरचे अर्थसाह्य देऊ केले आहे. याद्वारे तेथील विविध पायाभूत सुविधांच्या प्रकल्पांमध्ये गुंतवणूक केली जाणार आहे.
- ७ वर्षांत प्रथमच भारत दौऱ्यावर आलेल्या बांगलादेशच्या पंतप्रधान शेख हसिना आणि पंतप्रधान नरेंद्र मोदी यांनी ८ एप्रिल रोजी यासंबंधित २२ करारांवर स्वाक्षऱ्या केल्या.
- याशिवाय मोदी आणि शेख हसिना या दोघांनी व्हिडिओ लिंकच्या माध्यमातून कोलकाता ते ढाका या बससेवेचेही उद्घाटन केले.
- याशिवाय नरेंद्र मोडी यांनी भारत आणि बांगलादेशमध्ये डिझेलचा पुरवठा करण्यासाठी पाईपलाईन टाकण्याचीही घोषणा केली.
पाकच्या युनूस खानची आंतरराष्ट्रीय क्रिकेटमधून निवृत्ती
- पाकिस्तानचा कर्णधार मिस्बा-उल-हक पाठोपाठ पाकचा मधल्या फळीतील फलंदाज युनूस खाननेही आंतरराष्ट्रीय क्रिकेटमधून निवृत्ती घेण्याचा निर्णय घेतला आहे.
- २०००मध्ये कसोटी कारकिर्दीला सुरवात करणाऱ्या ३९ वर्षीय युनूस खाने आगामी वेस्ट इंडीजविरुद्धच्या मालिकेनंतर निवृत्त होणार आहे.
- नुकत्याच झालेल्या ऑस्ट्रेलियाविरुद्धच्या मालिकेत त्याने १७५ धावांची खेळी केली होती. कसोटी कारकिर्दीत १० हजार धावांचा टप्पा ओलांडण्यासाठी त्याला फक्त २३ धावांची गरज आहे.
- कसोटीत दहा हजार धावा करणारा तो पाकिस्तानचा एकमेव क्रिकेटपटू असेल. त्याने ५३.०६च्या सरासरीने धावा केल्या असून, यामध्ये ३४ शतकांचा समावेश आहे.
कोणत्याही टिप्पण्‍या नाहीत:
टिप्पणी पोस्ट करा