चालू घडामोडी : ५ एप्रिल
उत्तर प्रदेशमध्ये शेतकऱ्यांना कर्जमाफी
- उत्तर प्रदेशातील योगी आदित्यनाथ यांच्या नेतृत्वाखालील भाजपा सरकारने निवडणूक प्रचारात दिलेल्या आश्वासनाची पूर्तता करत मंत्रिमंडळाच्या पहिल्याच बैठकीत शेतकऱ्यांना कर्जमाफी देण्याचा निर्णय घेतला.
- या निर्णयानुसार शेतकऱ्यांचे १ लाख रुपयापर्यंत घेतलेले कर्ज माफ करण्यात येणार आहे. यासाठी ३६,००० कोटी रुपयांचा निधी देण्यात येणार आहे.
- सरकारने सरसकट कर्जमाफी न देता गेल्या दोन हंगामांत विविध प्रकारच्या नैसर्गिक आपत्तींमुळे जे कर्जफेड करू शकले नाहीत अशा ८६ लाख अत्यल्प आणि अल्पभूधारक शेतकऱ्यांचीच फक्त कर्ज माफ करण्याचा निर्णय घेण्यात आला.
- या कर्जमाफीसही प्रत्येकी एक लाख रुपयांची कमाल मर्यादा घालण्यात आली आहे. उत्तर प्रदेशातील शेतकऱ्यांची थकित कर्जे एकूण ६२ हजार कोटी रुपयांची आहेत.
- १ लाख रुपयांपर्यंत कर्ज घेतलेल्या शेतकऱ्यांची संख्या उत्तर प्रदेशात अडीच कोटी आहे. या निर्णयाने ३०,७२९ कोटी रुपयांची कर्जे माफ होतील.
- ३ लाख २७ हजार ४७० कोटी रुपयांच्या कर्जांचा बोजा डोक्यावर असलेले उत्तर प्रदेश हे देशातील दुसऱ्या क्रमांकाचे कर्जबाजारी राज्य आहे.
- याशिवाय योगी सरकारने शेतकऱ्यांचा सर्व शेतमाल हमीभावापेक्षा क्विंटलला १० रुपये जास्त देऊन खरेदी करण्याचाही निर्णय घेतला आहे.
विस्डेन वार्षिकांकाच्या मुखपृष्ठावर विराट कोहली
- भारतीय संघाचा कर्णधार विराट कोहलीला क्रिकेटमधील बायबल अशी ओळख असलेल्या विस्डेनच्या २०१७च्या वार्षिकांकाच्या मुखपृष्ठावर स्थान देण्यात आले आहे.
- हा मान मिळविणारा विराट हा वीरेंद्र सेहवाग आणि सचिन तेंडुलकरनंतरचा तिसरा भारतीय क्रिकेटपटू ठरला आहे.
- ‘विस्डेन’ क्रिकेटर्स अलमनॅक पुस्तिकेने विराट कोहलीला २०१६ या वर्षातील जगातील सर्वोत्तम क्रिकेटपटू म्हणून जाहीर केले आहे.
- विराटने २०१६मध्ये क्रिकेटच्या तिन्ही प्राकारात जबरदस्त कामगिरी केली आहे. त्याने सर्व प्रकारच्या आंतरराष्ट्रीय क्रिकेटमध्ये मिळून २,५९५ धावा केल्या आहेत.
- २०१६ या वर्षातच कोहलीने सलग ४ कसोटी सामन्यांत ४ द्विशतके केली. त्याच्या नेतृत्त्वात भारतीय संघाने कसोटी क्रमवारीत अग्रस्थानही प्राप्त केले.
- विस्डेनकडून ऑस्ट्रेलियाच्या एल्स पेरी हिला जगातील सर्वोत्तम दर्जाची महिला क्रिकेटपटू म्हणून सन्मानित करण्यात आले आहे.
- मिसबाह-उल-हक, युनूस खान, बेन डकेट, ख्रिस वोक्स, रोलैंड जोन्स यांनाही क्रिकेटर ऑफ द इअर म्हणून घोषित करण्यात आले.
- २००३पासून विस्डेनने वर्षातील सर्वोत्तम क्रिकेटपटूची निवड करण्यास सुरुवात केली. तेव्हापासून तीन भारतीयांनी हा मान पटकावला आहे.
- त्यात विस्फोटक फलंदाज वीरेंद्र सेहवागने २००८ आणि २००९ अशा सलग दोन वर्षांमध्ये विस्डेनचा सर्वोत्तम क्रिकेटपटू बनण्याचा मान मिळवला होता.
प्रतिबंधित औषध सेवनात भारताला तिसरे स्थान
- जागतिक उत्तेजक प्रतिबंधक समितीच्या (वाडा) अहवालानुसार प्रतिबंधित औषध सेवनात भारताने सलग तिसऱ्या वर्षी तिसरे स्थान पटकावले आहे.
- वाडाने २०१५मध्ये झालेल्या उत्तेजक प्रकरणांचा अहवाल प्रसिद्ध केला असून त्यानुसार भारताचे ११७ खेळाडू उत्तेचक चाचणीत दोषी आढळले आहेत.
- वाडाने २०१५मध्ये बंदी घातलेल्या भारताच्या ११७ दोषी खेळाडूंपैकी ७८ पुरुष खेळाडू असून ३७ महिला खेळाडूंचा समावेश आहे.
- या दोषी ११७ खेळाडूंपैकी सर्वाधिक ५६ खेळाडू (३२ पुरुष व २४ महिला) वेटलिफ्टिंगमधील आहेत.
- २०१५मध्ये रशियाचे १७६, आणि इटलीचे १२९ खेळाडू दोषी आढळल्याने ही दोन्ही राष्ट्रे अनुक्रमे पहिल्या दोन स्थानावर आहेत.
- २०१३मध्ये भारताच्या ९१ खेळाडूंवर, तर २०१४मध्ये भारताच्या ९६ खेळाडूंवर बंदीची कारवाई झाली होती. या दोन्ही यादीत भारताचे तिसरे स्थान होते.
- वाडाने उत्तेजक विरोधी नियमावली तयार केली असून त्या नियमांचे उल्लंघन करणाऱ्यांवर बंदी व आर्थिक दंडाची कारवाई करण्यात येते.
कोणत्याही टिप्पण्‍या नाहीत:
टिप्पणी पोस्ट करा