चालू घडामोडी : १ मे
पोलीस विभागात सर्वाधिक भ्रष्टाचार
- सेंटर फॉर मीडिया स्टडीजने देशभरातील २० राज्यांमध्ये केलेल्या सर्वेक्षणातून पोलीस विभागात सर्वाधिक भ्रष्टाचार असल्याची माहिती पुढे आली आहे.
- नागरी सेवा देणाऱ्या विभागांमधील भ्रष्टाचाराचे प्रमाण जाणून घेण्यासाठी शहरी आणि ग्रामीण भागातील ३ हजार लोकांकडून माहिती गोळा करण्यात आली होती.
- पोलीस विभागानंतर भ्रष्टाचारात जमीन व गृहनिर्माण, न्याय व्यवस्था आणि करसंबंधी विभाग यांचा क्रमांक लागतो.
- एफआयआर/तक्रार दाखल करण्यासाठी, आरोपी म्हणून नाव रद्द करण्यासाठी, अटक टाळण्यासाठी आणि वाहतूक पोलिसांनी पावती फाडू नये, म्हणून लाच दिली जात असल्याचे या सर्वेक्षणातून समोर आले आहे.
- देशातील १० नागरी सेवा देणाऱ्या विभागांनी २०१७मध्ये एकूण ६,३५० कोटी रुपयांची लाच स्वीकारल्याचे या अहवालातून समोर आले.
- २००५साली २०,५०० कोटी रुपयांची लाच देशातील नागरी सेवा देणाऱ्या १० विभागांनी स्वीकारली होती.
- नागरी सेवा मिळवण्यासाठी कोणताही पर्याय नसल्याने लाच द्यावी लागते, असे सर्वेक्षणादरम्यान २० राज्यांमधील जवळपास प्रत्येकाने सांगितले.
- दहा रुपयांपासून ते पन्नास हजार रुपयांपर्यंतची लाच नागरी सेवा देणाऱ्या विभागांकडून स्वीकारली जाते.
- सर्वेक्षणादरम्यान माहिती घेण्यात आलेल्या व्यक्तींनी सरासरी १,८४० रुपयांची लाच दिल्याची आकडेवारी अहवालातून समोर आली.
- ८ नोव्हेंबरला पंतप्रधान नरेंद्र मोदींनी जाहीर केलेल्या नोटाबंदीच्या निर्णयानंतर भ्रष्टाचाराचे प्रमाण घटल्याची माहिती अनेकांनी दिली.
सुमीत कुमारने हिंद केसरी किताब जिंकला
- रेल्वेचा आंतरराष्ट्रीय मल्ल सुमीत कुमारने पुण्याचा अभिजीत कटकेवर ९-२ गुणांनी मात करत, ५०व्या वरिष्ठ राष्ट्रीय कुस्ती स्पर्धेत ‘हिंद केसरी’ किताब पटकावला.
- हिंद केसरी किताबाच्या उपांत्य साखळी गटात सुमीतने अभिजीतला ६-१ अशा गुणांनी हरविले होते. अंतिम फेरीत अपेक्षेइतकी लढत अभिजीत देऊ शकला नाही.
- विजेत्या सुमितला रोख अडीच लाख रुपये व चांदीची गदा; तसेच उपविजेत्या अभिजितला रोख दीड लाख व करंडक प्रदान करण्यात आला.
- श्रीमंत दगडूशेठ हलवाई सार्वजनिक गणपती ट्रस्ट आणि सुवर्णयुग तरुण मंडळाच्या वतीने ही स्पर्धा आयोजित करण्यात आली होती.
जोश्ना चिनप्पाला आशियाई स्क्वॉश स्पर्धेचे विजेतेपद
- भारताच्या जोश्ना चिनप्पाने भारताच्याच दीपिका पल्लीकलला पराभूत करत आशियाई स्क्वॉश स्पर्धेतील महिला गटाचे विजेतेपद पटकावले.
- ही स्पर्धा जिंकणारी ती पहिलीच भारतीय महिला ठरली आहे. यापूर्वी १९९६मध्ये भारताच्या मिशा ग्रेवालने या स्पर्धेत उपविजेतेपद मिळविले होते.
- पाच गेममध्ये झालेल्या लढतीत जोश्नाने १३-१५, १२-१०, ११-१३, ११-४, ११-४ अशी मात करत विजेतेपद पटकावले.
- पुरुष गटात मात्र भारताच्या सौरव घोषालला उपविजेतेपद मिळाले. हाँगकाँगच्या मॅक्स ली याने घोषालला पराभूत करून विजेतेपद पटकावले.
आशियाई अ‍ॅथलेटिक्स ग्रांप्रि स्पर्धेत भारताला २ सुवर्णपदके
- राष्ट्रीय विक्रमवीर धावपटू मुहम्मद अनास आणि गोळाफेकपटू ओम प्रकाश कऱ्हाना यांनी आशियाई अ‍ॅथलेटिक्स ग्रांप्रि स्पर्धेच्या तिसऱ्या आणि अखेरच्या दिवशी सुवर्णपदक जिंकले.
- अनासने ४५.६९ सेकंदांची नोंद करून पहिले आंतरराष्ट्रीय स्पर्धेतील सुवर्णपदक पटकावले. मात्र त्याला जागतिक अजिंक्यपद स्पर्धेसाठीची ४५.५० सेकंदांची पात्रता वेळ गाठण्यात अपयश आले.
- याआधी त्याने ४५.४० सेकंदांसह राष्ट्रीय विक्रम नोंदवला होता आणि गतवर्षी त्याने ४५.४४ सेकंदांची नोंद केली होती.
- व्हिएतनामच्या चाँग लीच व कझाकस्तानच्या मिखल लिटव्हीन यांनी अनुक्रमे रौप्य व कांस्यपदक जिंकले.
- पुरुषांच्या गोळाफेक प्रकारात कऱ्हानाने तिसऱ्या प्रयत्नात सर्वोत्तम १९.५८ मीटर अंतर गाठून सुवर्णपदकाची कमाई केली.
- त्याचे हे पहिलेच आंतरराष्ट्रीय सुवर्णपदक आहे. चीनच्या वू जिक्सिंग आणि इराणच्या अली समारी यांनी अनुक्रमे रौप्य व कांस्यपदक जिंकले.
- कऱ्हानाने पहिल्या दोन लीगमध्ये कांस्यपदकांची कमाई केली होती. २०१२साली त्याने सर्वोत्तम २०.६९ मीटरची नोंद केली होती.
- मनप्रीत कौर (महिला गोळाफेक), टिंटू लुका (महिला ८०० मी.), जिन्सन जॉन्सन (पुरुष ८०० मी.) आणि द्युती चंद (१०० मी.) यांनी आपापल्या गटात रौप्यपदक जिंकले.
- तर नीरज चोप्रा (भालाफेक) आणि एमआर पूवाम्मा (महिला ४०० मी.) यांनी आपापल्या गटात कांस्यपदक जिंकले.
गिर्यारोहक उली स्टेकचा अपघाती मृत्यू
- जगातील सर्वोच्च शिखर माऊंट एव्हरेट दोन वेळा यशस्वीरित्या पार केलेल्या स्वित्झर्लंडचा सुप्रसिद्ध गिर्यारोहक उली स्टेकचा माऊंट एव्हरेट चढताना अपघाती मृत्यू झाला.
- उली स्टेकने याआधी २०१२ आणि २०१५साली यशस्वीरित्या एव्हरेस्ट सर केला होता. तेही ऑक्सिजन पुरवठ्याविना त्याने ही कमाल केली होती.
- अतिशय सहजपणे पर्वत रांगा सर करणाऱ्या स्टेकला ‘स्विस मशीन’ या नावाने ओळखले जायचे.
- ४०वर्षीय स्टेक यावेळी एव्हरेस्ट शिखर तिसऱ्या नव्या मार्गाने सर करण्याचा प्रयत्न करत होता. या दरम्यान ३२८० फूट उंचीवर असताना त्याचा अपघाती मृत्यू झाला.
- स्टेकच्या जाण्याने जगातील गिर्यारोहकांनी दु:ख व्यक्त केले आहे. स्टेकने गिर्यारोहणादरम्यान चित्रीत केलेले व्हिडिओ पाहून युवकांमध्ये गिर्यारोहणाची आवड निर्माण झाली होती.
कोणत्याही टिप्पण्‍या नाहीत:
टिप्पणी पोस्ट करा