बिहारचे मुख्यमंत्री नितीश कुमार यांच्या नेतृत्वाखाली संयुक्त जनता दलाने (जदयु) पुन्हा एकदा भाजपाप्रणीत राष्ट्रीय लोकशाही आघाडीमध्ये (एनडीए) सहभागी होण्याचा निर्णय घेतला आहे.
काही दिवसांपूर्वी भाजपचे राष्ट्रीय अध्यक्ष अमित शहा यांनी नितीश कुमारांची भेट घेतल्यानंतर जदयूला एनडीएत सामील होण्याचे निमंत्रण दिले होते.
जदयुच्या राष्ट्रीय कार्यकारिणीच्या बैठकीत एनडीएमध्ये सामील होण्याचा प्रस्ताव बहुमताने मंजूर करण्यात आला. नितीशकुमार या बैठकीचे अध्यक्ष होते.
बिहारमधील महाआघाडीमधून बाहेर पडून भाजपशी हातमिळवणी करून सत्ता स्थापन करण्याच्या निर्णयावरही या बैठकीत शिक्कामोर्तब करण्यात आले.
यावेळी नाराज असलेल्या शरद यादव गटातील काही कार्यकर्त्यांनी एनडीमध्ये सहभागी होण्याचा निषेध करत नितीश कुमार यांच्या विरोधात जोरदार घोषणाबाजी केली.
जदयूच्या प्रवेशामुळे २०१९च्या लोकसभा निवडणुकीत भाजपची ताकद आणखी वाढली आहे.
आरबीआयकडून ५० रूपयांच्या नव्या नोटेची घोषणा
रिझर्व्ह बँक ऑफ इंडियाने ५० रूपयांच्या नव्या नोटेची घोषणाकेली असून लवकरच ती बाजारात येणार आहे.
५० रूपयांच्या या नव्या नोटेवर महात्मा गांधींचे छायाचित्र असेल. या नोटेवर बँकेचे गव्हर्नर उर्जित पटेल यांची स्वाक्षरी असेल.
५० रूपयांच्या नव्या नोटेचा रंग हा फिकट निळा आहे. ही नोट आकाराने १३५ मिमी लांब आणि ६६ मिमी रूंद आहे.
या नव्या नोटेवर देशाचा सांस्कृतिक वारसा दाखवण्यात आला आहे. नोटेच्या मागील बाजूस विजयनगर साम्राज्याची राजधानी हंपीचे छायाचित्र आहे.
८ नोव्हेंबर २०१६ रोजी नोटाबंदीचा निर्णय पंतप्रधानांनी जाहीर केल्यानंतर ५०० आणि २ हजार रूपयांच्या नव्या नोटा चलनात आणल्या गेल्या आहेत. त्यानंतर आता ५० रूपयांची नवी नोट चलनात येणार आहे.
भारताची अमेरिकेकडून तेलाची खरेदी
अमेरिकेने कॉंग्रेसने तेलाच्या निर्यातीवरील बंदी उठविल्यानंतर भारताने अमेरिकेकडून १० कोटी डॉलर किंमतीच्या तेलाची खरेदी केली आहे.
या तेलाचे जहाज अमेरिकेतून भारताच्या दिशेने निघाले असून सप्टेंबर महिन्यामध्ये ते भारतात येण्याची शक्यता आहे.
२०१६साली अमेरिकेने तेलाच्या निर्यातीवरील बंदी उठवली. ओबामा सरकारच्या काळामध्ये हा महत्त्वपूर्ण निर्णय घेण्यात आला होता.
पंतप्रधान नरेंद्र मोदी आणि अमेरिकेचे अध्यक्ष ट्रम्प यांच्यातील चर्चेनंतर भारतीय कंपन्यांना अमेरिकन तेल आयातीसाठी परवानगी देण्यात आली आहे.
त्यानुसार इंडियन ऑइल कार्पोरेशन आणि भारत पेट्रोलियम कार्पोरेशनने चाळीस लाख बॅरल्स तेलाची मागणी अमेरिकेकडे नोंदविली आहे.
या कंपन्यांबरोबर हिंदुस्थान पेट्रोलियम कार्पोरेशन लिमिटेडही अमेरिकन तेलाची खरेदी करण्याची शक्यता आहे.
भारत हा जगातील तेल आयात करणारा जगातील तिसऱ्या क्रमाकांचा देश आहे. चीन, द. कोरिया आणि जपाननंतर भारत हा आशियातील अमेरिकचे तेल खरेदी करणारा चौथा देश बनला आहे.
अमेरिकेने आपले अंतर्गत तेलाचे उत्पादन वाढवल्यानंतर आंतरराष्ट्रीय बाजारपेठेत तेलाच्या किंमती झपाट्याने घसरल्या आहेत.
व्हेनेझुएलासारख्या केवळ तेलाच्या निर्यातीवर अवलंबून असणाऱ्या देशांना याची मोठी झळ सहन करावी लागली.
आता अमेरिकेने तेलाची निर्यात सुरु केल्यावर या देशांवर आणखी परिणाम होण्याची शक्यता आहे.
कोणत्याही टिप्पण्‍या नाहीत:
टिप्पणी पोस्ट करा