‘ओल्ड माँक’ या रमला प्रसिद्धीच्या शिखरावर पोहोचवणारे पद्मश्री ब्रिगेडिअर (निवृत्त) कपिल मोहन यांचे ६ जानेवारी रोजी गाझियाबाद येथे वयाच्या ८८व्या वर्षी निधन झाले.
कपिल मोहन हे १९६५च्या आधीपासून ट्रेड लिंक्स प्रा. लि.चे प्रमुख होते. त्यांनी डायर मीकिन ब्रेव्हरेजची धुरा सांभाळल्यानंतर कंपनीचा विविध क्षेत्रात विस्तार केला होता.
एडवर्ड डायरने वर्ष १८५५मध्ये कसौली येथे डायर मीकिन ब्रेव्हरेजची स्थापना केली होती. १९६६मध्ये या कंपनीचे मोहन मीकिन ब्रेव्हरीज लि. असे नामांतर करण्यात आले होते.
कपिल मोहन यांनी या कंपनीची धुरा सांभाळल्यानंतर ‘ओल्ड माँक’ रम भारतातच नव्हे तर जगात लोकप्रिय झाली झाली होती.
१९५४मध्ये ‘ओल्ड माँक’चे उत्पादन सुरू झाले होते. जगात सर्वाधिक विकली जाणारी रम म्हणून ‘ओल्ड माँक’ची ख्याती होती.
त्यांच्या नेतृत्वाखाली कंपनीने तीन नवे डिस्टिलरी आणि दोन ब्रेव्हरेज सुरू करण्याशिवाय देशातील विविध भागात फ्रँचायजींचा विस्तारही केला होता.
मोहन यांनी नंतर ग्लास, ब्रेकफास्ट फुड, ज्यूस आणि अभियांत्रिकी उद्योगातही पाऊल ठेवले होते.
विविध क्षेत्रात सक्रिय असलेल्या मोहन यांच्यामुळे मीकिन लि.ची सध्याची उलाढाल ही ४०० कोटी रूपयांहून अधिक आहे.
लष्करातून निवृत्त झाल्यानंतर, उद्योग व्यवसायात केलेल्या उल्लेखनीय कार्याबद्दल त्यांना २०१०मध्ये पद्मश्री किताबाने सन्मानित करण्यात आले.
ऑगस्टा वेस्टलँड घोटाळ्यातील सर्व आरोपी निर्दोष
ऑगस्टा वेस्टलँड हेलिकॉप्टर घोटाळा प्रकरणात इटलीतील मिलान कोर्टाने सर्व आरोपींना पुराव्यांअभावी निर्दोष ठरविले आहे.
ऑगस्टा वेस्टलँड आणि फिनमेकॅनिका कंपनीचे माजी प्रमुख गिसेपी ओरसी, बिचोलिए क्रिश्चियन मिशेल, ऑगस्टा वेस्टलँडचे माजी उच्चाधिकारी गियूसेपे ओरसी आणि ब्रुनो स्पेगनोलिनी यांचा आरोपींमध्ये समावेश होता.
या व्यवहारात फिनमेकनिका कंपनीचे माजी प्रमुख गिसेपी ओरसी यांच्यावर लाच दिल्याचा आरोप लावण्यात आला होता.
या व्हीव्हीआयपी हेलिकॉप्टर करारामध्ये भ्रष्टाचार झाल्याचे सिद्ध व्हावे यासाठी लागणारे ठोस असे पुरावे नाहीत, असे कोर्टाने सांगितले.
या व्यवहारामुळे भारताला नुकसान झाल्याचेही इटलीच्या कोर्टाले फेटाळले आहे. मात्र दुसरीकडे, या करारामुळे नुकसान झाल्याचा आरोप भारताकडून करण्यात आला होता.
याप्रकरणी भारतातही खटला सुरू आहे. परंतु मिलान कोर्टाच्या या निर्णयामुळे सीबीआयचा खटला कमकुवत होण्याची शक्यता आहे.
या प्रकरणी सीबीआयची माजी वायुसेना प्रमुख एसपी त्यागी यांच्यासहीत अनेक आरोपींविरोधात चौकशी सुरू आहे.
२जी घोटाळानंतर ऑगस्ट वेस्टलँड हेलिकॉप्टर प्रकरणातही कोर्टाने ठोस पुरावे नसल्याचे म्हटले आहे. हे दोन्ही घोटाळे यूपीए सरकारच्या काळात झाले होते.
युसूफ पठाण उत्तेजक द्रव्य चाचणीत दोषी
भारतीय क्रिकेट संघातून सध्या बाहेर असलेला अष्टपैलू खेळाडू युसूफ पठाण बीसीसीआयच्या उत्तेजक द्रव्य चाचणीत दोषी आढळला आहे.
गेल्या वर्षी तब्येत बिघडलेली असताना उपचारासाठी युसूफ पठाणने डॉक्टरांच्या सल्ल्यानुसार युसूफने काही औषधे घेतली होती.
मात्र ही औषधे बीसीसीआयने घालून दिलेल्या नियमांमध्ये बसत नाहीत. अशा औषधांचे सेवन केल्यास ते उत्तेजक द्रव्यांचे सेवन मानले जाते.
त्यामुळे बीसीसीआयने युसूफ पठाणला ५ महिन्यांच्या बंदीची शिक्षा सुनावली आहे.
आतापर्यंत युसूफ पठाणने भारताचे ७९ सामन्यांमध्ये प्रतिनिधीत्व केले आहे. २०१२ नंतर मात्र युसूफ पठाणला भारतीय संघात स्थान मिळालेले नाही. राष्ट्रीय क्रिकेटमद्ये तो बडोद्याच्या संघाचे प्रतिनिधीत्व करतो.
२००७ च्या टी-२० आणि २०११च्या एकदिवसीय विश्वचषक विजेत्या भारतीय संघाचा युसूफ पठाण सदस्य होता.
७५वा गोल्डन ग्लोब पुरस्कार सोहळा २०१८
७ जानेवारी रोजी पार पडलेल्या ७५व्या गोल्डन ग्लोब पुरस्कार सोहळ्यात अझीझ अन्सारी यांच्या रूपाने प्रथमच आशियाई कलाकाराला सर्वोत्कृष्ट अभिनेत्याचा पुरस्कार मिळाला.
‘मास्टर ऑफ नन’ या टीव्ही मालिकेतील अभिनयासाठी अझिझ अन्सारी यास सर्वोत्कृष्ट विनोदी अभिनयासाठी पुरस्कार प्रदान करण्यात आला.
अन्सारी हा गोल्डन ग्लोब पुरस्कार मिळवणारा यंदाचा एकमेव आशियाई कलाकार ठरला आहे.
अन्सारी भारतीय वंशाचा कलाकार आहे. तो मूळचा तामिळनाडूतील आहे. मात्र, त्याचा जन्म आणि शिक्षण अमेरिकेत झाले आहे.
या पुरस्कार सोहळ्यावर निर्माता हार्वे वाइनस्टीन याने केलेल्या लैंगिक छळाच्या प्रकरणाचे पडसाद उमटले.
किमान ७० अभिनेत्रींचा वाइनस्टीनने छळ केल्याचे आजवर उघड झाले आहे. त्याचा निषेध म्हणून या कार्यक्रमात काळ्या रंगाचा पेहराव करण्याचे आवाहन करण्यात आले होते.
त्यानुसार निषेधाचा हा सूर पेहराव आणि भाषणांतून व्यक्त झाला. या सोहळ्यात विजेत्यांची, लैंगिक छळ आणि मानधनातील स्त्री-पुरुष भेदभाव या मुद्द्यांवरील भाषणे महत्त्वाची ठरली.
कोणत्याही टिप्पण्‍या नाहीत:
टिप्पणी पोस्ट करा