स्वित्झर्लंडमध्ये दावोस येथे २२ जानेवारीपासून ‘वर्ल्ड इकॉनॉमिक फोरम’च्या ४८व्या वार्षिक सभेला सुरुवात झाली आहे.
या सभेसाठी पंतप्रधान नरेंद्र मोदी दावोसमध्ये दाखल झाले असून, गेल्या २० वर्षांमध्ये भारतीय पंतप्रधानांनी या परिषदेला हजर राहण्याची ही पहिलीच वेळ आहे. १९९७साली तत्कालीन पंतप्रधान एचडी देवेगौडा या परिषदेला हजर राहिले होते.
या परिषदेत पंतप्रधान नरेंद्र मोदींनी हिंदीमध्ये भाषण केले. आपल्या भाषणात त्यांनी आज जगासमोर असलेल्या वेगवेगळया आव्हानांचा आढावा घेतला.
एफडीआयसाठी आकर्षक देशांच्या यादीत भारत पाचवा
जगातीलगुंतवणुकीसाठी आकर्षक देशांची एक यादी तयार करण्यात आली असून या यादीत भारताने जपानला मागे टाकत पाचवे स्थान मिळविले आहे.
‘प्राईसवॉटर हाऊस कुपर्स’ या संस्थेने जगभरातील टॉप कंपन्यांच्या सीईओंची मते जाणून घेतल्यानंतर हा अहवाल तयार केला आहे.
या यादीत अमेरिका पहिल्या स्थानी आहे. अमेरिकेत गुंतवणुकीसाठी पुरेशा संधी आहेत, असे अहवालात म्हटले आहे.
चीन या यादीत दुसऱ्या स्थानी असून जर्मनी तिसऱ्या स्थानी आहे. तर युरोप चौथ्या आणि भारत पाचव्या स्थानी आहे.
भारतातील गुंतवणुकीचे प्रमाण वाढवण्यासाठी मोदी सरकारचे प्रयत्न सुरु आहेत. भारत उद्योगस्नेही देश असल्याचा दावा मोदी सरकारकडून केला जात आहे.
प्रसिद्ध व्यंगचित्रकार चंडी लाहिरी यांचे निधन
पश्चिम बंगालमधील प्रसिद्ध व्यंगचित्रकार चंडी लाहिरी यांचे १८ जानेवारी रोजी निधन झाले. त्यांनी ५० वर्षे व्यंगचित्रकार म्हणून काम केले.
साधेपणा व सोपेपणा ही त्यांच्या व्यंगचित्राची खास वैशिष्ट्ये होती. त्यांच्या विनोदबुद्धीची धार तीक्ष्ण होती, पण त्यामुळे कधी कुणी दुखावले गेले नाही.
त्यांचा जन्म १३ मार्च १९३१ रोजी नडिया जिल्ह्यात झाला. १९४२च्या राजकीय चळवळीत सहभागी होते.
पत्रकारितेत त्यांची सुरुवात १९५२मध्ये दैनिक ‘लोकसेवक’ या बंगाली वृत्तपत्रात वार्ताहर म्हणून झाली. पण नंतर ते १९६१मध्ये व्यंगचित्रकलेकडे वळले.
त्यानंतर ते ‘आनंदबझार पत्रिका’ समूहात काम करू लागले. त्यांची राजकीय व्यंगचित्रे ही नेहमीच चर्चेचा विषय ठरत.
भारताच्या राजकीय इतिहासाचे व स्वातंत्र्यलढय़ाचे सखोल ज्ञान त्यांना होते, ते त्यांच्या व्यंगचित्रातून जाणवत असे.
कारकीर्दीच्या आरंभीच ट्राम अपघातात त्यांचा एक हात गेला होता तरी त्यावर मात करून ते जीवनात यशस्वी झाले.
मिश्के, नेंगटी, बिदेशीदर चोखे बांगला, चंडीर चंडीपथ, बांगलार कार्टून इतिहास ही त्यांची बंगाली, तर चंडी लुक्स अराउंड व सिन्स फ्रीडम ही इंग्रजी पुस्तके प्रसिद्ध आहेत.
कोलकाता दूरदर्शन केंद्रासाठी सचेतपटकार (ॲनिमेटर) म्हणूनही त्यांनी मोठे काम केले.
तसेच रुद्रप्रसाद सेनगुप्ता यांच्या ऑबिराटो चेनामुख या मालिकेत त्यांनी रंगीत व्यंगचित्रांचे अ‍ॅनिमेशन केले होते.
संवेदनशील मनाच्या चंडीदांनी बाल कर्करोग रुग्णालयासाठी मोफत व्यंगचित्रे काढून दिली होती.
बंगाल व कोलकाता या दोन विषयांवर त्यांना व्यंगचित्र मालिका काढायची होती. त्यांनी ती तयारही करून दिली, पण ती पुस्तकरूपात येणे राहिले.
महिला टी-२० विश्वचषक२०१८चे यजमानपद वेस्ट इंडिजला
२०१८मध्ये पार पडणाऱ्या आयसीसी महिला टी-२० विश्वचषकाचे यजमानपद वेस्ट इंडिजकडे सोपविण्यात आले आहे.
९ ते २४ नोव्हेंबरदरम्यान ही स्पर्धा रंगणार असून, यावेळी यजमान वेस्ट इंडिजचा संघ आपले २०१६चे विजेतेपद कायम राखण्याचा प्रयत्न करेल.
२०१६ साली झालेल्या विश्वचषकात वेस्ट इंडिजने ऑस्ट्रेलियाच्या संघावर ८ गडी राखून मात केली होती.
वेस्ट इंडिजसह या स्पर्धेत ऑस्ट्रेलिया, इंग्लंड, न्यूझीलंड, भारत, पाकिस्तान, दक्षिण आफ्रिका आणि श्रीलंका हे संघ सहभागी होणार आहेत.
उर्वरित दोन स्थानांसाठी बांगलादेश, हॉलंड, आयर्लंड, पापुआ न्यू गिनीआ, स्कॉटलंड, थायलंड, युगांडा, संयुक्त अरब अमिरात यांच्यात स्पर्धा रंगणार आहे.
लायबेरियाच्या राष्ट्राध्यक्षपदी माजी फुटबॉलपटू जॉर्ज विआ
लायबेरियाचे माजी फुटबॉलपटू जॉर्ज विआ यांची लायबेरिया देशाचे राष्ट्राध्यक्ष म्हणून निवड झाली आहे.
२००२नंतर फुटबॉलमधून निवृत्ती घेतल्यानंतर जॉर्ज विआ हे राजकारणात सक्रिय झाले. ते लायबेरियाच्या संसदेत सिनेटरही आहेत.
२६ डिसेंबर २०१७ रोजी लायबेरियात राष्ट्राध्यक्षपदासाठी निवडणूक झाली होती. या निवडणुकीत प्रतिस्पर्धी असलेल्या जोसेफ बोआकाई यांचा पराभव करत जॉर्ज यांनी त्यांच्याहून ६० टक्के जास्त मते मिळवली.
जॉर्ज विआ यांनी २३ जानेवारी रोजी लायबेरियाच्या राष्ट्राध्यक्षपदाचा पदभार स्वीकारला. त्यांनी माजी राष्ट्राध्यक्ष एलेन जॉन्सन यांची जागा घेतली आहे.
कोणत्याही टिप्पण्‍या नाहीत:
टिप्पणी पोस्ट करा