चालू घडामोडी : २३ मार्च

सौदी अरेबियाच्या आकाशातून पहिल्यांदाच इस्राइलला गेले विमान

• एअर इंडियाचे एक विमान २२ मार्च रोजी पहिल्यांदाच सौदी अरेबियाच्या आकाशातून प्रवास करत इस्त्राइलमधील बेन गुरियन एअरपोर्टवर पोहोचले. 
• सौदी अरेबियाने इस्राइलला जाणाऱ्या विमानांना आपल्या आकाशाचा वापर करू देण्याची ही पहिलीच वेळ आहे.
• काही दिवसांपूर्वी भारतातून इस्त्रायल आणि इस्त्रायलहून भारताकडे जाणारी विमाने सौदी अरेबियाच्या आकाशातून नेण्यास सौदी अरेबियाने परवानगी दिली होती. यामुळे प्रवासाचा वेळ सुमारे २ तासांनी कमी झाला आहे.
• सौदी अरेबियाच्या धोरणात झालेला हा आतापर्यंतचा सर्वांत मोठा कूटनीतिक बदल आहे. दोन वर्षांच्या सातत्यपूर्ण प्रयत्नानंतर असे होऊ शकले आहे.

राज्यसभा निवडणुकांनंतर भाजपा राज्यसभेतील सर्वात मोठा पक्ष

• राज्यसभेच्या २६ जागांसाठी झालेल्या मतदानात सर्वाधिक १२ जागा जिंकून भाजपाने इतिहास रचला आहे.
• पक्षाच्या स्थापनेनंतर ३८ वर्षांत पहिल्यांदाच भाजपा हा राज्यसभेतील सर्वात मोठा पक्ष ठरला आहे.
• परंतु, राष्ट्रीय लोकशाही आघाडी संसदेच्या वरिष्ठ सभागृहात बहुमतापासून दूर आहे. राज्यसभेत आता भाजपाचे ६९ खासदार आहेत, तर काँग्रेस सदस्यांची संख्या ५० आहे.
• एकूण २४५ सदस्यांच्या राज्यसभेत बहुमतासाठी १२६चा आकडा गाठणे आवश्यक आहे. मात्र, रालोआच्या सदस्यांची एकत्रित संख्या त्यापेक्षा कमी आहे.
• २३ मार्च रोजी ७ राज्यांमध्ये राज्यसभेच्या २५ जागांसाठी मतदान झाले. त्यात भाजपाला १२, काँग्रेसला ५, तृणमूल काँग्रेसला ४, तेलंगणा राष्ट्र समितीला ३ आणि जदयूला १ जागा मिळाल्या.
• यावर्षभरात राज्यसभेच्या १७ राज्यांमधील ५९ जागा रिक्त झाल्या. त्यातील ३३ जागा बिनविरोध निवडल्या गेल्या. त्यापैकी १६ जण भाजपाचे होते.

फणसाला केरळकडून राज्यफळाचा दर्जा बहाल

• केरळ राज्याने फणस या फळाला राज्यफळाचा मान बहाल केला. राज्याचे कृषिमंत्री व्ही. एस. सुनीलकुमार यांनी विधानसभेत ही घोषणा केली.
• झाडाला लागणारे सर्वांत मोठे फळ अशी ओळख असलेल्या फणसाला हा मान देणारे केरळ हे पहिलेच राज्य आहे.
• फणसाच्या उत्पादनात केरळचा देशात सहावा क्रमांक लागतो. केरळमध्ये दरवर्षी ३० कोटींहून अधिक फणसांचे उत्पादन होते.
• देशातील २० राज्यांमध्ये फणस पिकत असून, फणस उत्पादनात त्रिपुराचा क्रमांक पहिला आहे.
• त्याखालोखाल ओरिसा, आसाम, प. बंगाल, कर्नाटक, केरळ, छत्तीसगढ ही  फणसाची सर्वाधिक उत्पादन करणारी राज्ये आहेत. फणस उत्पादनात महाराष्ट्राचा देशात १५वा क्रमांक लागतो.

---