चालू घडामोडी : २७ मार्च

ज्येष्ठ साहित्यिक डॉ. गंगाधर पानतावणे यांचे निधन

• ज्येष्ठ साहित्यिक, अस्मितादर्श चळवळीचे जनक आणि पहिल्या विश्व मराठी साहित्य संमेलनाचे अध्यक्ष डॉ. गंगाधर पानतावणे यांचे २७ मार्च रोजी निधन झाले.
• गंगाधर विठोबाजी पानतावणे यांचा जन्म २८ जून १९३७ साली नागपूर येथे झाला. नागपूर महाविद्यालयातून त्यांनी बी.ए. आणि एम.ए.ची पदवी मिळवली. मराठवाडा विद्यापीठातून त्यांनी पी.एच.डी. मिळवली.
• डॉ. पानतावणे यांच्याकडे स्वच्छपणे समजलेला आंबेडकरी ध्येयवाद होता व साहित्य म्हणजे काय याची त्यांना तेवढीच जाणीवही होती.
• दलित साहित्य आणि दलित चळवळीत मोलाचे योगदान देणाऱ्या पानतावणे यांनी लोकसाहित्य, कविता, नाटक, समीक्षा आणि संशोधनपर लेखन केले.
• पानतावणे यांचे धम्मचर्चा, मूल्यवेध, मूकनायनक, विद्रोहाचे पाणी पेटले आहे, वादळाचे वंशज, दुसऱ्या पिढीचे मनोगत, लेणी आदी साहित्य प्रकाशित झाले होते.
• ‘अस्मितादर्श’ या नियतकालिकाच्या संपादकपदाची महत्त्वपूर्ण जबाबदारीही त्यांनी घेतली होती.
• डॉ. गंगाधर पानतावणे यांनी २००९साली अमेरिकेतील सॅन होजे येथे झालेल्या पहिल्या विश्व मराठी साहित्य संमेलनाचे अध्यक्षपद भूषविले होते.
• डॉ. बाबासाहेब आंबेडकर आंतरराष्ट्रीय पुरस्कार, दलित साहित्य अकादमी, फाय फाउंडेशन, महाराष्ट्र राज्य साहित्य संस्कृती मंडळाची गौरववृत्ती आदी पुरस्कारांनी त्यांना सन्मानित करण्यात आले होते. केंद्र सरकारने नुकतेच त्यांना पद्मश्री पुरस्काराने सन्मानित केले होते.

डॅरेन लेहमनला ऑस्ट्रेलियाच्या प्रशिक्षकपदावरुन पायउतार

• बॉल टॅम्परिंगच्या वादामुळे ऑस्ट्रेलिया क्रिकेटमध्ये खळबळ माजली असून डॅरेन लेहमनला ऑस्ट्रेलिया संघाच्या प्रशिक्षकपदावरुन पायउतार करण्यात आले आहे.
• दक्षिण आफ्रिकेविरोधात चौथा कसोटी सामना सुरु होण्याआधीच डॅरेन लेहमनने प्रशिक्षकपदाचा राजीनामा दिला आहे.
• दक्षिण आफ्रिकेविरोधातील तिसऱ्या कसोटी सामन्यात कर्णधार स्टिव्ह स्मिथने वरिष्ठ खेळाडूंसोबत मिळून कॅमरून बेनक्राफ्टकडून बॉल टॅम्परिंग करण्याची रणनीती आखल्याची कबुली दिली होती.
• यानंतर ऑस्ट्रेलियामध्ये खळबळ माजली असून खेळाडूंवर टीकेची झोड उठली आहे. यानंतर ऑस्ट्रेलिया सरकारने स्टिव्ह स्मिथला कर्णधारपदावरुन तातडीने हटविण्याचे आदेश क्रिकेट ऑस्ट्रेलियाला दिले होते.
• त्यानंतर काहीवेळातच कर्णधार स्मिथ आपल्या पदावरून पायउतार झाला. याचसोबत डेव्हिड वॉर्नरनेही उप-कर्णधारपदाचा राजीनामा दिला.
• या प्रकारामुळे क्रिकेट ऑस्ट्रेलियाची प्रतिमा चांगलीच डागाळली असून दोषी खेळाडूंवर आजीवन बंदीची कारवाई होण्याचीही शक्यता वर्तवली जात आहे.

---