पंतप्रधान नरेंद्र मोदी १५व्या दक्षिण पूर्व आशियाई राष्ट्रांच्या (आशियान) भारत शिखर परिषदेसह १२व्या ईस्ट आशिया परिषदेला उपस्थितीत राहण्यासाठी फिलीपीन्सला रवाना झाले.
दोन्ही परिषदे व्यतिरिक्त या तीन दिवसीय दौऱ्यादरम्यान प्रधानमंत्री मोदी व अमेरिका राष्ट्राध्यक्ष डोनाल्ड ट्रंप यांची बैठक होऊ शकते.
या तीन दिवसीय फिलीपीन्स दौऱ्यात मोदी १३ नोव्हेंबर रोजी आशियानच्या व्यवसाय आणि गुंतवणुक परिषदेला उपस्थित राहतील.
यासोबतच प्रधानमंत्री मोदी फिलिपीन्सचे राष्ट्राध्यक्ष रोडीनो डुपेरटे यांच्या सोबत द्विपक्षीय बैठकीत सामील होतील. रोडीनो हे आशियानचे विद्यमान अध्यक्ष आहेत.
याच वेळी आशियानच्या ५०व्या वर्धापनदिनानिम्मित रोडीनो यांच्यातर्फे विशेष उत्सवाचे आयोजन करण्यात आले आहे.
१४ नोव्हेंबर रोजी प्रधानमंत्री मोदी मनिला येथील प्रादेशिक व्यापक आर्थिक सहभागाच्या बैठकीत भाग घेतील आणि आशियाई देशांच्या राष्ट्रांशी भारताचे व्यापार आणि गुंतवणुकीचे संबंध वाढविण्यावर भर देतील.
आशियान राष्ट्रांसोबत भारताचा व्यापार हा इतर देशांच्या तुलनेत १० टक्क्यांहून अधिक आहे.
मनिलामध्ये, प्रधानमंत्री मोदी इतर काही जागतिक नेत्यांची भेट घेतील, जे पूर्व आशिया शिखर सम्मेलनात सहभागी होणार आहेत.
तसेच ते आंतरराष्ट्रीय तांदूळ संशोधन संस्था आणि महावीर फिलीपीन्स फाउंडेशनलाही भेट देणार आहेत.
बांगलादेशाच्या हिंदू सरन्यायाधीशांचा राजीनामा
सरकारबरोबरील मतभेदानंतर बांगलादेशाचे पहिले हिंदू सरन्यायाधीश सुरेंद्र कुमार सिन्हा यांनी राजीनामा दिला आहे.
सिन्हा यांच्यावर मनी लाँड्रिंग, भ्रष्टाचार आणि आर्थिक अनियमितता यासारखे आरोप लावण्यात आले होते. त्यामुळे गेल्या एक महिन्यांपासून ते सक्तीच्या सुटीवर होते.
या काळात ते परेदशात गेले होते. ऑस्ट्रेलियातून त्यांनी राष्ट्रपती अब्दुल हामिद यांच्याकडे राजीनामा पाठवला.
सिन्हा यांनी १७ जानेवारी २०१५ मध्ये बांगलादेशाचे २१वे सरन्यायाधीश म्हणून पदभार स्वीकारला होता. त्यांचा कार्यकाळ पुढील वर्ष ३१ जानेवारी रोजी पूर्ण होणार होता.
सर्वोच्च न्यायालयाच्या न्यायाधीशांवर महाभियोग चालवण्याचा संसदेचा अधिकार रद्द करण्याच्या त्यांच्या निर्णयामुळे सरकार त्यांच्यावर नाराज होते.
सर्वोच्च न्यायालयाच्या पाच वरिष्ठ न्यायाधीशांनी सिन्हा यांच्यावर मनी लाँड्रिंग आणि भ्रष्टाचारासारखे गंभीर आरोप करत त्यांच्याबरोबर काम करण्यास नकार दिला होता.
अमेरिकेक्डून पाकिस्तानला ७० कोटी डॉलरची मदत
अमेरिकन काँग्रेसने पाकिस्तानला ४.५ हजार कोटी रूपयांची (७० कोटी डॉलर) मदत देण्याचा प्रस्ताव मंजूर केला आहे.
अमेरिकेकडून अफगाणिस्तानमध्ये सुरू असलेल्या अभियानाला समर्थन देण्याच्या बदल्यात पाकिस्तानला ही रक्कम दिली जाणार आहे.
पाकिस्तानने त्यांना मिळालेली मदत दहशतवादी समूहाला पुरवू नये याकडे अमेरिकेच्या संरक्षण विभागाने लक्ष ठेवण्याची विनंती अमेरिकेच्या राष्ट्रीय सुरक्षा प्राधिकरणाने केली आहे.
‘न्यूड’ सिनेमाला इफ्फीमधून वगळले
रवि जाधव दिग्दर्शित ‘न्यूड’ या सिनेमाला ४८व्या इंटरनॅशनल फिल्म फेस्टिव्हलमधून (इफ्फी) वगळण्यात आले आहे.
१३ ज्युरी मेबर्सनी एकुण २४ सिनेमांची इफ्फीमध्ये इंडियन पॅनोरमा विभागासाठी निवड केली होती. पॅनोरमा विभागात न्यूड सिनेमाचे स्क्रीनिंगही होणार होते.
पण सिनेमाच्या नावावर आक्षेप घेत, केंद्रीय माहिती व प्रसारण मंत्रालयाने जारी केलेल्या यादीतून या सिनेमाला वगळण्यात आले आहे.
ज्युरी मेंबर्सचा सल्ला न घेता हा मोठा बदल करण्यात आला आहे. त्यामुळे काही ज्युरी मेंबर्सनी केंद्राच्या या निर्णयावर नाराजी व्यक्त केली आहे.
दिग्दर्शक रवि जाधव यांचा ‘न्यूड’ हा सिनेमा न्यूड मॉडेल म्हणून काम करणाऱ्या एका तरूण स्त्रीच्या जीवनावर आधारीत आहे.
न्यूड सिनेमाव्यतिरिक्त सनलकुमार ससिधरन दिग्दर्शित मल्ल्याळम सिनेमा ‘एस दुर्गा’ला सुद्धा इफ्फीतून वगळण्यात आले आहे.
मुशर्रफ यांची २३ राजकीय पक्षांची महाआघाडी
पाकिस्तानचे माजी राष्ट्रपती आणि हुकूमशहा परवेज मुशर्रफ यांनी २३ राजकीय पक्षांची ‘पाकिस्तान अवामी इत्तेहाद’ (पीएआय) ही महाआघाडी स्थापन केली आहे.
याच्या अध्यक्षपदी मुशर्रफ असतील तर, इकबाल डार यांची महासचिवपदी नियुक्ती करण्यात आली आहे.
मुहाजीर समुदायाचे प्रतिनिधित्व करणाऱ्या पक्षांना या नव्या राजकीय आघाडीत सहभागी होण्याचे आवाहन मुशर्रफ यांनी केले आहे.
या आघाडीतील सर्व पक्षांचे सदस्य यापुढे पाकिस्तान अवामी इत्तेहाद या एकाच पक्षाच्या नावाने निवडणुका लढतील.
मुशर्रफ यांच्यावर गतवर्षी विशेष न्यायालयाने देशद्रोहाचा आरोप लावला होता. यावर्षी ऑगस्टमध्ये बेनझीर भुट्टो हत्या प्रकरणात त्यांना फरार घोषित करण्यात आले होते.
कोणत्याही टिप्पण्‍या नाहीत:
टिप्पणी पोस्ट करा