रणजी करंडक स्पर्धेच्या अंतिम फेरीत गुजरातने मुंबईवर पाच गडी राखून विजय मिळवत पहिल्यांदा रणजी स्पर्धेचे विजेतेपद प्राप्त केले आहे.
कर्णधार पार्थिव पटेलच्या १४३ धावांच्या जोरावर गुजरातने मुंबईच्या ३१२ धावांचा यशस्वी पाठलाग करत ८३ वर्षांत प्रथमच रणजी करंडक जिंकला.
रणजी स्पर्धेच्या इतिहासात इतकी मोठी धावसंख्या आतापर्यत तीन फक्त वेळा पार करण्यात प्रतिस्पर्धी संघ यशस्वी ठरला होता.
मुंबईने आतापर्यंत ४०वेळा रणजी करंडक जिंकला असून ४१व्यांदा रणजी करंडक जिंकण्याची संधी त्यांच्याकडे होती.
आमिर सूफी यांना फिशर ब्लॅक पुरस्कार
अमेरिकन फायनान्स असोसिएशनच्या वतीने दिला जाणारा प्रतिष्ठेचा फिशर ब्लॅक पुरस्कार आमिर सूफी यांना मिळाला आहे. अर्थशास्त्रात मूलभूत संशोधन करणाऱ्यांना हा पुरस्कार दिला जातो.
सूफी सध्या शिकागो विद्यापीठाच्या बूथ स्कूल ऑफ बिझिनेसमधील अर्थशास्त्र व सार्वजनिक धोरण विषयाचे प्राध्यापक आहेत.
या संस्थेच्या प्राध्यापकास हा पुरस्कार मिळण्याची ही तिसरी वेळ आहे. याआधी टोबियास मोसकोवित्झ आणि रिझर्व्ह बँकेचे माजी गव्हर्नर रघुराम राजन यांनाही हा पुरस्कार मिळाला आहे.
चाळीस वर्षांखालील अर्थशास्त्रज्ञांना हा पुरस्कार दिला जातो. तरुण अर्थतज्ज्ञांना संशोधनास प्रेरणा मिळावी हा फिशर पुरस्कारामागचा हेतू आहे.
ज्या फिशर ब्लॅक यांच्या नावाने हा पुरस्कार दिला जातो ते गोल्डमन सॅशचे माजी भागीदार होते व शिकागो बूथ स्कूल तसेच एमआयटीत प्राध्यापक होते.
‘घरांसाठीचे कर्ज व आर्थिक पेचप्रसंग’ या विषयावरील संशोधनासाठी सूफी यांना या पुरस्काराने गौरवण्यात आले आहे.
सूफी यांनी जार्जटाऊन विद्यापीठाच्या वॉल्श स्कूल ऑफ फॉरेन सर्व्हिस या संस्थेतून अर्थशास्त्राची पदवी घेतली आहे.
नंतर त्यांनी मॅसॅच्युसेट्स इन्स्टिटय़ूट ऑफ टेक्नॉलॉजी या संस्थेतून याच विषयात पीएच.डी. केली. नंतर २००५मध्ये ते शिकागोच्या बूथ स्कूलमध्ये प्राध्यापक झाले.
महामंदी, ग्राहकांचा वस्तू वापर, कर्ज बाजारपेठा व त्यात घरकर्जाची भूमिका हे सूफी यांच्या संशोधनाचे मुख्य विषय आहेत.
त्यांच्या संशोधनाचे निष्कर्ष अमेरिकेतील फेडरल रिझर्व्ह, गृहनिर्माण व शहर विकासावरील सिनेट समिती, व्हाइट हाऊसचे आर्थिक सल्लागार मंडळ यांनाही सादर करण्यात आले.
अमेरिकेच्या फेडरल रिझर्व्ह या मध्यवर्ती बँकेत त्यांनी सहायक अर्थतज्ज्ञ म्हणूनही काम केले आहे.
सूफी हे नॅशनल ब्युरो ऑफ इकॉनॉमिक रीसर्च या संस्थेचे संशोधन सहायक तसेच अमेरिकन इकॉनॉमिक रिव्ह्य़ू व जर्नल ऑफ इकॉनॉमिक्स या नियतकालिकांचे सहायक संपादकही आहेत.
त्यांनी अतिफ मियाँ यांच्यासमवेत ‘हाऊस ऑफ डेब्ट- हाऊ दे (अ‍ॅण्ड यू) कॉज्ड द ग्रेट रेसेशन अ‍ॅण्ड हाऊ वुई कॅन प्रिव्हेन्ट इट फ्रॉम हॅपनिंग अगेन’ हे पुस्तक लिहिले आहे.
‘फायनान्शियल टाइम्स’च्या यादीत २०१४मध्ये उद्योग व अर्थशास्त्रातील सर्वोत्तम पुस्तक म्हणून ते नावाजले गेले होते.
रशियामध्ये धूम्रपान आणि तंबाखू मुक्तीसाठी कायदा
धूम्रपानावर नियंत्रण आणण्यासाठी २०१५नंतर जन्मलेल्या व्यक्तींना सिगारेटची विक्री करण्यात येणार नसल्याचा निर्णय रशियाच्या आरोग्य मंत्रालयाने घेतला आहे.
रशियाच्या आरोग्य मंत्रालयाने दिलेल्या या प्रस्तावाला रशियाचे अध्यक्ष व्लादिमीर पुतिन यांनीही मंजुरी दिली आहे.
त्यामुळे तंबाखूवर पूर्णपणे बंदी आणणारा रशिया हा जगातील पहिला देश ठरला आहे.
रशियाने धूम्रपान आणि तंबाखू मुक्तीसाठी आणलेल्या या कायद्याचे परिणाम २०३३मध्ये दिसायला सुरुवात होईल. कारण २०१५नंतर जन्मलेली मुले तेव्हा १८ वर्षांची होतील.
२०१६च्या आकडेवारीनुसार रशियातील धूम्रपान करणाऱ्यांची संख्या १० टक्क्यांनी कमी झाली आहे.
मात्र रशियातील धूम्रपान करणाऱ्यांचे प्रमाण कमी करण्यासाठी आणि कालांतराने ते शून्यावर आणण्यासाठी हा निर्णय घेतला आहे.
ग्रामीण विकासासाठी अनोखा प्रकल्प
ग्रामीण भागाचा विकास करण्यासाठी शिक्षण संस्थांना जोडण्याच्या उद्देशाने केंद्र सरकारने एक अनोखा प्रकल्प आखला आहे.
यासाठी मानव संसाधन विकास मंत्रालय व ग्रामीण विकास आणि पंचायत राज मंत्रालय यांच्यामध्ये ‘उन्नत भारत’ कार्यक्रमाअंतर्गत सामंजस्य करार करण्यात आला आहे.
या सामंजस्य करारानुसार, मानव संसाधन विकास मंत्रालय सर्व उच्च शिक्षण देणाऱ्या संस्थांना ग्रामपंचायती दत्तक घेण्यासाठी प्रोत्साहन देईल.
या संस्था ग्रामपंचायतींचा प्रत्यक्षस्थळी जाऊन अभ्यास करतील आणि या ग्रामपंचायतींच्या विकासासाठी आवश्यक नावीन्यपूर्ण उपाय सूचित करतील.
त्यानंतर योग्य मूल्यांकन करून जिल्हा प्रशासनाकडून त्यांची अंमलबजावणी करण्यात येईल.
पंचायत राज मंत्रालय ‘ग्राम पंचायत विकास आराखडा’मध्ये शिक्षण संस्थांना सहभागी करून घेईल. तसेच स्थानिक स्वराज्य संस्था आणि शिक्षण संस्था यांच्यामध्ये दुवा म्हणून हे मंत्रालय कार्य करेल.
हा कार्यक्रम प्राथमिक टप्प्यामध्ये ९२ जिल्हय़ात राबविण्यात येणार असून, तो यशस्वी झाल्यानंतर देशभरात त्याची अंमलबजावणी करण्यात येईल.
प्रयोगशील कंपन्यांच्या यादीतून टाटांच्या कंपन्या बाद
बोस्टन कन्सलिंग ग्रुप या समूहाने प्रकाशित केलेल्या जगातल्या ५० सर्वात प्रयोगशील कंपन्यांच्या यादीतून टाटा समूहातल्या कंपन्या बाद झाल्या आहेत.
ही यादी दरवर्षी प्रकाशित करण्यात येते. या यादीत २०१५मध्ये टाटा मोटर्सने २६वे तर २०१४मध्ये टाटा कन्सल्टन्सी सर्व्हिसेसने ४३वे स्थान मिळविले होते.
भारतीय उद्योगजगतात टाटा समूहाला अतिशय मनाचे स्थान आहे. परंतु तरीही यावर्षीच्या यादीत टॉप ५०मध्ये टाटा समूहातली एकही कंपनी नाही.
एक शतकापासूनही जास्त काळ उद्योगक्षेत्रात असलेल्या टाटा समूहाचा भारतीय अर्थव्यवस्थेची अनेक क्षेत्रे विकसित करायला मोठा हातभार लागला आहे.
मिठापासून स्टील उद्योगापर्यंत टाटांनी आपल्या समूहाचे जाळे पसरवले. असे असूनही टाटा समूह जगातल्या ५० सर्वात प्रयोगशील कंपन्या यादीतून बाद झाला आहे.
कोणत्याही टिप्पण्‍या नाहीत:
टिप्पणी पोस्ट करा