ज्येष्ठ साहित्यिक तथा युवा साहित्यिकांचे प्रेरणास्थान असलेले ८९ वर्षीय प्रा. पुरुषोत्तम श्रीपत पाटील यांचे १६ जानेवारी रोजी वृध्दापकाळाने निधन झाले.
केवळ काव्याला वाहिलेल्या कवितारती या द्वैमासिकाचे तसेच अनुष्टूभ या साहित्य विषयक मासिकाचे ते संपादक होते. मराठी साहित्य जगतात त्यांची ‘पुपाजी’ म्हणून ओळख होती.
तळातल्या सावल्या, बलिदान या कवितासंग्रहांसह तुकारामाची काठी हा त्यांचा वैचारिक लेखसंग्रह प्रसिद्ध आहे.
कवितेसाठी वाहिलेले 'कवितारती' हे द्वैमासिक त्यांनी १९८५ मध्ये सुरू केले. ते आजतागायत सुरू आहे.
उत्तम वक्ता म्हणून त्यांची केवळ राज्य अथवा देशातच नव्हे तर परदेशातही ख्याती होती. अभ्यासपुर्ण विवेचन हा त्यांचा गाभा होता.
ज्येष्ठ दिवंगत कवि बा. भ. बोरकर, ज्ञानपिठाचे सन्मानार्थी वि. स. खांडेकर यांचे लेखनिक म्हणून प्रा. पुरुषोत्तम पाटील यांनी कार्य केले होते. कवी कुसुमाग्रज हे त्यांचे प्रेरणास्थान होते.
त्यांच्या कविता संग्रहांना शासनाचा केशवसुत आणि बालकवी पुरस्कारही मिळाले आहेत.
पुरुषोत्तम पाटील यांचा जन्म ३ मार्च १९२८ रोजी जळगाव जिल्ह्यात झाला. पुणे येथील फर्ग्युसन महाविद्यालयात प्रवेश घेतल्यावर त्यांनी कविता करण्यास सुरुवात केली.
त्यांनी मराठीचे प्राध्यापक म्हणून नोकरी केली होती. त्यांनी पुढे ‘जनशक्ती’मध्ये उपसंपादक म्हणूनही काम केले.
त्यांचा पहिला काव्यसंग्रह 'तळ्यातल्या सावल्या' १९७८मध्ये प्रकाशित झाला. त्यास राज्य शासनाचा पुरस्कार मिळाला.
अखिल भारतीय मराठी साहित्य महामंडळ आणि महाराष्ट्र राज्य साहित्य व संस्कृती मंडळ यांचे ते सदस्य होते.
१९८५मध्ये प्रजासत्ताकदिनी झालेल्या अखिल भारतीय बहुभाषिक कविसंमेलनात त्यांनी महाराष्ट्राचे प्रतिनिधित्व केले होते.
जलिकट्टू अध्यादेशाला मंजुरी
जलिकट्टू खेळावरून तामिळनाडूमध्ये चिघळलेल्या परिस्थितीच्या पार्श्वभूमीवर केंद्र सरकारने जलिकट्टू अध्यादेशाला काही बदलांसह मंजुरी दिली आहे.
हा अध्यादेश मंजुरीसाठी राष्ट्रपती प्रणव मुखर्जी यांच्याकडे पाठवण्यात येणार आहे. तामीळनाडूचे मुख्यमंत्री ओ पान्नीरसेल्वम यांनी याबाबत पंतप्रधान नरेंद्र मोदी यांची भेट घेतली होती.
जलिकट्टू या पारंपारिक खेळाला परवानगी मिळावी, यासाठी लाखो लोकांसोबत सेलिब्रिटींनीही आवाज उठवला.
संगीतकार ए. आर. रहमान, रजनीकांत, अभिनेते कमल हसन, विश्वनाथन आनंद, आर अश्विन, आर्ट ऑफ लिव्हिंगचे प्रणेते श्री श्री रवीशंकर यांनी जलिकट्टूचे समर्थन केले आहे.
महामेट्रोच्या स्थापनेला केंद्राची मंजुरी
महाराष्ट्र मेट्रो रेल्वे कॉपोर्रेशनच्या (महामेट्रो) स्थापनेला केंद्र शासनाने २० जानेवारी रोजी मंजुरी दिली आहे.
राज्यातील मुंबई वगळता इतर सर्व मेट्रो प्रकल्पांची अंमलबजावणी या कंपनी मार्फत करण्यात येणार आहे.
नागपूर येथील मेट्रोचे काम नागपूर मेट्रो कार्पोरेशन या कंपनीमार्फत केले जात होते. त्यानंतर पुणे मेट्रोला मंजुरी मिळाल्याने पुन्हा नवीन कंपनी स्थापन करण्याची दीर्घकालीन प्रक्रिया पार पाडावी लागणार होती.
त्यामुळे शासनाने नागपूर मेट्रो कंपनीचे रूपांतर महाराष्ट्र मेट्रो रेल्वे कार्पोरेशनमध्ये करून त्या कंपनीकडे मुंबई वगळता सर्व प्रकल्प सोपविण्याचा निर्णय घेतला होता.
महामेट्रोचे अध्यक्ष व केंद्रीय नगरविकास विभागाचे प्रधान सचिव राजीव गौबा यांच्या अध्यक्षतेखाली दिल्लीत नगरविकास मंत्रालयात महामेट्रोच्या संचालक मंडळाची पहिली बैठक पार पडली.
या निकालामुळे आता मेट्रो कंपनीला नदीपात्रातील कामात येणारा अडथळा दूर झाला आहे. पुणे मेट्रोचा साधारण १.७ किलोमीटरचा मार्ग नदीपात्रातून जाणार आहे.
अभय योजनेमध्ये ठेवी स्वीकारण्यास सहकारी बॅंकांना बंदी
केंद्र सरकारच्या नव्या अभय योजनेमध्ये ठेवी स्वीकारण्यास केंद्र सरकारने सर्व सहकारी बॅंकांना बंदी केली आहे.
५० टक्के कर भरून काळा पैसा जाहीर करण्यासाठी सरकारने अभय योजना जाहीर केली आहे. ३१ मार्चपर्यंत ही योजना लागू आहे.
याआधी नोटबंदी जाहीर केल्यानंतर जुन्या पाचशे आणि हजाराच्या नोटा सहकारी बॅंकांनी स्वीकारण्यावर बंदी घालण्यात आली होती.
काळा पैसा पांढरा करण्यासाठी सरकारी बॅंकांचा वापर होईल, अशी शंका केंद्र सरकारला असल्यामुळे हे पाऊल उचलण्यात आलं होते.
याच कारणास्तव आता पुन्हा एकदा सरकारकडून अभय योजनेचे पैसे स्वीकारण्यास सरकारी बॅंकांना मनाई केली आहे.
९७वे अ. भा. मराठी नाट्यसंमेलन उस्मानाबादमध्ये
९७वे अखिल भारतीय मराठी नाट्यसंमेलन उस्मानाबाद येथे ७ ते ९ एप्रिल २०१७ या कालावधित होणार आहे.
ज्येष्ठ रंगकर्मी जयंत सावरकर यांची या संमेलनाच्या अध्यक्षपदी याआधीच निवड झाली आहे.
नोटाबंदी आणि फेब्रुवारीमध्ये राज्यात होणाऱ्या निवडणुका यामुळे दरवर्षी जानेवारी किंवा फेब्रुवारीमध्ये होणारे नाट्यसंमेलन यावर्षी एप्रिलमध्ये होणार आहे.
पाकिस्तानच्या ताब्यातील जवान चंदू चव्हाणची सुटका
पाकिस्तानच्या ताब्यात असलेला भारतीय जवान चंदू चव्हाण याची पाकिस्तानकडून सुटका करण्यात आली आहे.
चंदू चव्हाण हा २३ वर्षांचा असून, तो मुळचा धुळे जिल्ह्यातील बोरविहीर येथील आहे. लष्कराच्या ३७ राष्ट्रीय रायफल्समध्ये तो सेवेत आहे.
३० सप्टेंबरला गस्त घालत असताना तो नजरचुकीने सीमा ओलांडून पाकिस्तानात गेला होता.
यानंतर चंदू चव्हाणला पाकिस्तानच्या सैन्याने ताब्यात घेतले होते. तेव्हापासून चंदू चव्हाण पाकिस्तानच्या ताब्यात होता.
चंदू चव्हाण याच्या सुटकेसाठी भारताच्या डिजीएमओंनी १५ ते २० वेळा पाकिस्तानच्या डिजीएमओंसोबत संवाद साधला होता.
केंद्र सरकारच्या या प्रयत्नांना यश आले आणि २१ जानेवारी रोजी चंदू चव्हाणची सुटका करण्यात आली.
कोणत्याही टिप्पण्‍या नाहीत:
टिप्पणी पोस्ट करा