नवाझ शरीफ यांच्या राजीनाम्यानंतर शाहिद खाकान अब्बासी हे पाकिस्तानचे हंगामी पंतप्रधान म्हणून कार्यभार स्वीकारणार आहेत.
नवाझ शरीफ यांचे बंधू शाहबाज शरीफ हे खासदार म्हणून निवडून येईपर्यंत अब्बासी हे पंतप्रधानपदी कायम असतील.
सत्ताधारी पाकिस्तान मुस्लीम लीग-नवाझ (पीएमएल-एन) पक्षाच्या नवाझ शरीफ यांच्या अध्यक्षतेखाली पार पडलेल्या बैठकीत हा निर्णय घेण्यात आला.
संसदेत शरीफ यांच्या पीएमएल-एन यांच्या पक्षाकडे बहुमत असल्याने पंतप्रधानपदाला तूर्तास तरी धोका नाही.
शरीफ यांचे बंधू आणि सध्या पंजाब प्रांताचे मुख्यमंत्री असलेले शाहबाज शरीफ हे शरीफ यांचे उत्तराधिकारी असतील.
मात्र पाकिस्तानच्या राज्यघटनेनुसार संसदेचा सदस्य नसलेली व्यक्ती पंतप्रधान होऊ शकत नाही. त्यामुळे शाहबाज यांना संसदेच्या कनिष्ठ सभागृहावर (मजलिस-ए-शूरा) खासदार म्हणून निवडून येणे आवश्यक आहे.
यासाठी नवाझ शरीफ यांच्या राजीनाम्यामुळे रिक्त झालेल्या जागेवरुन शाहबाज शरीफ निवडणूक लढवतील.
हा मतदारसंघ शरीफ कुटुंबीयांचा बालेकिल्ला असून शाहबाज शरीफ यांचा विजय निश्चित मानला जात आहे.
जेष्ठ उर्दू लेखक नैयर मसूद यांचे निधन
सरस्वती पुरस्काराने सन्मानित जेष्ठ उर्दू लेखक नैयर मसूद यांचे २४ जुलै २०१७ रोजी निधन झाले.
मसूद यांचे गंजिफा, इत्र ए कांफूर, ताऊस चमन की मैना इत्यादी लघुकथा संग्रह प्रसिध्द आहेत. ३५ कादंबऱ्या व अनेक लघुकथा त्यांच्या नावावर आहेत.
नैयर मसूद यांचा जन्म सन १९३६मध्ये लखनौ येथे झाला. नैयर मसूद यांचे वडील सईद मसूद हसन रिझवी हे लखनौ विद्यापीठात पर्शियन भाषा शिकवायचे.
नैयर यांनीदेखील लखनौ विद्यापीठात पर्शियन भाषेचे अध्यापन दीर्घकाळ केले. या भाषेच्या विभागाचे ते प्रमुखही होते.
जागतिक साहित्यात खूपच मोठे स्थान असलेल्या फ्रान्झ काफ्काच्या कथा उर्दू भाषेत अनुवादित करण्याचे मोलाचे काम मसूद यांनी केले. काफ्काच्या कथा उर्दूत आणणारे नैयर हे एकमेव लेखक.
त्यांच्या लिखाणात सामाजिक व राजकीय विषय सर्रास दिसतात. मात्र त्यांचे लिखाण त्या अर्थाने सुलभ, सोपे नाही. वास्तव, स्वप्न, गूढता यांचे अजब मिश्रण त्या लिखाणात आढळते.
त्यांना २००१ साली उर्दू भाषेसाठी साहित्य अकादमी पुरस्काराने तर २००७ साली सरस्वती सम्मान प्रदान करून गौरविण्यात आले.
साहित्य आणि शिक्षण क्षेत्रातील त्यांच्या योगदानाबद्दल भारत सरकारने त्यांना १९७० साली पद्मश्री पुरस्काराने गौरविले होते.
‘ओबामाकेअर’ विधेयक मतदानात ट्रम्प पराभूत
अमेरिकेत ओबामाकेअर नावाने आळखले गेलेले विधेयक रद्द करण्यासाठी झालेल्या मतदानात ट्रम्प प्रशासन ४९ विरुद्ध ५१ मतांनी पराभूत झाले.
अमेरिकेचे माजी अध्यक्ष बराक ओबामा यांनी अमेरिकी नागरिकांना सवलतीच्या दरांत आरोग्यसेवा पुरवण्यासाठी ओबामाकेअर विधेयक संमत केले होते.
मात्र या विधेयकामुळे सरकारच्या तिजोरीवर मोठा ताण पडत असल्याचे सांगत सध्याचे अध्यक्ष डोनाल्ड ट्रम्प यांनी ते रद्द करण्याचे प्रयत्न चालवले होते.
ट्रम्प यांनी अध्यक्षीय निवडणुकीदरम्यानही निवडून आल्यास ओबामाकेअर विधेयक रद्द करण्याचे आश्वासन अमेरिकी मतदारांना दिले होते.
या विधेयकाबाबत अमेरिकेच्या सिनेटमध्ये झालेल्या मतदानात ट्रम्प यांच्या रिपब्लिकन पक्षाच्या ३ सिनेटरनी विरोधात मतदान केल्याने ट्रम्प यांचा पराभव झाला.
ट्रम्प यांचा रिपब्लिकन पक्ष साधारणपणे ओबामाकेअर विधेयक रद्द करण्याच्या तर विरोधी डेमोक्रॅट पक्ष हे विधेयक कायम ठेवण्याच्या बाजूने होता.
मात्र ट्रम्प यांच्या रिपब्लिकन पक्षाच्या जॉन मॅककेन, सुसान कॉलिन्स आणि लिसा मर्कोवस्की या तीन सिनेटरनी ओबामाकेअर कायम ठेवण्याच्या बाजूने मतदान करत बंडखोरी केली.
बीफ निर्यातीत भारत जगात तिसरा
अन्न आणि कृषी संस्था अर्थात एफएओ आणि ऑर्गनायझेशन फॉर इकॉनॉमिक कोऑपरेशन (ओईसीडी) यांनी प्रसिध्द केलेल्या अहवालानुसार बीफच्या निर्यातीत भारताचा जगात तिसरा क्रमांक लागतो.
या दोन्ही संस्थांनी २०१७ ते २०२६ या दशकभराचा अहवाल सादर केला आहे, ज्यामध्ये पुढची दहा वर्षे बीफ निर्यातीत भारत तिसऱ्या क्रमाकांवर राहिल असेही नमूद करण्यात आले आहे.
गेल्या वर्षी भारतानं १.५६ मिलियन टन बीफ निर्यात केले, हेच प्रमाण येत्या काळात कायम राहिल असा अंदाज वाटतो आहे.
जगात जे बीफ निर्यात केले जाते त्याचा १६ टक्के वाटा येत्या दहा वर्षांमध्ये भारत उचलेल ज्याचे प्रमाण २०२६पर्यंत १.९३ मिलियन टन असेल, असेही या अहवालात स्पष्ट करण्यात आले आहे.
जागतिक क्रमवारीचा विचार करता, बीफ निर्यातीत ब्राझील पहिल्या क्रमांकावर तर ऑस्ट्रेलिया दुसऱ्या स्थानी आहे.
कोणत्याही टिप्पण्‍या नाहीत:
टिप्पणी पोस्ट करा