राष्ट्रीय लोकशाही आघाडीचे उपराष्ट्रपतीपदासाठीचे उमेदवार वैंकय्या नायडू यांनी शहर विकास तसेच केंद्रीय माहिती व प्रसारण मंत्रीपदाचा राजीनामा दिला आहे.
त्यामुळे केंद्रीय माहिती व प्रसारण मंत्रालयाची अतिरिक्त जबाबदारी आता वस्त्रोद्योग मंत्री स्मृती इराणी यांच्याकडे सोपवण्यात आली आहे.
तर ग्रामीण विकास मंत्री नरेंद्रसिंह तोमर यांच्याकडे शहर विकास मंत्रालयाची अतिरिक्त जबाबदारी सोपवण्यात आली आहे.
याशिवाय सरकारमधील संरक्षण व पर्यावरण ही मंत्रालयेही सध्या रिक्त असून अर्थमंत्री अरुण जेटली यांच्याकडे संरक्षण; तर विज्ञान व तंत्रज्ञान मंत्री हर्षवर्धन यांच्याकडे पर्यावरण मंत्रालयाचा अतिरिक्त भार सोपविण्यात आला आहे.
एनडीएकडून उपराष्ट्रपतीपदासाठी नायडू यांच्या नावाची घोषणा करण्यात आली आहे. त्यांची लढत संयुक्त पुरोगामी आघाडीचे (यूपीए) उमेदवार गोपाळकृष्ण गांधी यांच्याशी होणार आहे.
मायावतींचा राज्यसभेच्या सदस्यत्त्वाचा राजीनामा
बहुजन समाज पक्षाच्या (बसपा) सर्वेसर्वा मायावती यांनी १८ जुलै रोजी राज्यसभेच्या सदस्यत्त्वाचा राजीनामा दिला.
दलितांवर होणाऱ्या अत्याचारांविरोधात सभागृहात बोलायला न दिल्याने नाराज झालेल्या मायावतींनी आपल्या खासदारकीचा राजीनामा दिला आहे.
पुढील वर्षी एप्रिलमध्ये मायावती यांच्या राज्यसभा खासदारकीचा कार्यकाळ संपणार होता.
राज्यसभेत मायावती यांनी सहारनपुरमध्ये झालेल्या हिंसेचा संदर्भ देत दलितांवरील अत्याचाराच्या घटना वाढल्याचा मुद्दा उपस्थित केला.
या संदर्भातील स्थगन प्रस्ताव त्यांनी राज्यसभेत मांडला. पण या प्रस्तावावर बोलण्यासाठी त्यांना फक्त ३ मिनीटांची वेळ देण्यात आली.
मायावती यांनी राज्यसभेत स्थगन प्रस्ताव मांडल्यानंतर सभेत काहीवेळासाठी गदारोळ झाला. यानंतर राज्यसभेचे कामकाज तहकूब करण्यात आले होते.
त्या प्रस्तावावर बोलत असताना राज्यसभेचे उपसभापती पी जे कुरियन यांनी यांनी मायावतींची भाषणाची ३ मिनिटांची वेळ संपल्यानंतर त्यांना खाली बसण्यास सांगितले.
त्यामुळे नाराज झालेल्या मायावतींनी आपल्या पदाचा राजीनामा दिला. तसेच रालोआ सरकारच्या काळात आपल्याला राज्यसभेत बोलून दिले जात नसल्याचा आरोपही त्यांनी केला.
भरत अरुण भारतीय संघाचे नवे गोलंदाजी प्रशिक्षक
भारतीय क्रिकेट संघाच्या गोलंदाजी प्रशिक्षकपदी माजी मध्यमगती गोलंदाज भरत अरुण यांची निवड करण्याचा निर्णय घेण्यात आला आहे.
याशिवाय संजय बांगर यांची सहाय्यक प्रशिक्षक म्हणून तर क्षेत्ररक्षक प्रशिक्षक म्हणून आर श्रीधर यांची निवड झाली आहे.
यापुर्वी सचिन तेंडुलकर, सौरव गांगुली व व्हीव्हीव्हीएस लक्ष्मण या क्रिकेट सल्लागार समितीने राहुल द्रविडला परदेश दौऱ्यावर फलंदाजी सल्लागार आणि झहीरला गोलंदाजी सल्लागार म्हणून नियुक्त केले होते.
मात्र टीम इंडियाचे नवनियुक्त मुख्य प्रशिक्षक रवी शास्त्री यांनी भरत अरुण आणि आर श्रीधर यांची शिफारस केली होती.
रवी शास्त्रींप्रमाणेच आगामी २०१९च्या विश्वचषकापर्यंत सर्व नवीन प्रशिक्षकांकडे संघाची जबाबदारी असणार आहे.
विम्बल्डन २०१७
मिश्र दुहेरी
स्वित्झर्लंडची मार्टिना हिंगीस आणि ब्रिटनचा जेमी मरे या अव्वल मानांकीत जोडीने विम्बल्डन मिश्र दुहेरीचे विजेतेपद पटकावले.
त्यांनी अंतिम सामन्यात हीथर वॉटसन (ब्रिटन) व हेन्री कॉन्टीनेन (फिनलँड) या जोडीचा ६-४, ६-४ असा पराभव केला.
पुरुष दुहेरी
पोलंडच्या लुकास कुबोट आणि ब्राझीलच्या मार्सेलो मेलो या जोडीने रोमांचक बाजी मारत विम्बल्डनच्या पुरुष दुहेरीचे विजेतेपद पटकावले.
कुबोट-मेलो यांनी ओलिव्हर मराच (ऑस्ट्रिया) व मेट पाविच (क्रोएशिया) या जोडीचे कडवे आव्हान ५-७, ७-५, ७-६, ३-६, १३-११ असे परतवून लावले.
महिला दुहेरी
एकाटेरिना माकारोव्हा आणि एलेना व्हेस्निना या रशियन ऑलिम्पिक सुवर्ण विजेत्या जोडीने महिला दुहेरीच्या विजेतेपदाला गवसणी घातली.
महिला दुहेरीच्या अंतिम सामन्यात माकारोव्हा-व्हेस्निना जोडीने चिंग चान (तैवान) व मोनिका निकोलस्कु (रोमानिया) यांचा ६-०, ६-० असा धुव्वा उडवला.
ब्रिटनच्या संसदीय निवड समितीमध्ये प्रीत कौर गिल
प्रीत कौर गिल यांच्या रूपाने पहिल्यांदाच एका महिला शिख व्यक्तीची ब्रिटनच्या संसदीय निवड समितीमध्ये निवड करण्यात आली आहे.
या समितीमध्ये ११ जणांचा समावेश आहे. गृह मंत्रालयाच्या कामकाजावर लक्ष ठेवणे हे या समितीचे मुख्य काम आहे.
प्रीत कौर या लेबर पार्टीच्या खासदार आहेत. बर्मिंघम एबेस्टन येथून त्यांनी निवडणूक जिंकली आहे.
यापुर्वी सप्टेंबर २०१६पर्यंत लेबर पार्टीच्या केथ वेज या समितीमध्ये होत्या. ९ वर्ष केथ वेज ह्या या समितीच्या अध्यक्षा होत्या. मात्र ड्रग्स आणि वेश्यावृत्तीच्या आरोपांमुळे त्यांना या समितीमधून बाहेर पडावे लागले.
कोणत्याही टिप्पण्‍या नाहीत:
टिप्पणी पोस्ट करा