ब्रिटिश वैज्ञानिक त्रिमूर्तीला भौतिकशास्त्राचे नोबेल
ब्रिटिशवंशीय शास्त्रज्ञ डेव्हिड थोउलेस, डंकन हेल्डन आणि मायकल कोस्टेरलिट्स यांना भौतिकशास्त्राचा नोबेल पुरस्कार जाहीर करण्यात आला.
द्रव्याच्या स्थितीवर केलेल्या संशोधनासाठी त्यांना हा पुरस्कार देण्यात आला आहे. हे तिघेही ब्रिटिश वंशाचे असले तरी काम अमेरिकेत करतात.
डॉ. थोउलेस हे वॉशिंगटन विद्यापीठात, डॉ. हेल्डन हे प्रिंन्स्टन विद्यापीठ तर डॉ. कोस्टेरलिट्स हे ब्राऊन विद्यापीठात कार्यरत आहेत.
भौतिकशास्त्रातील योगदानाबद्दल रॉयल स्वीडिश अॅकेडमी ऑफ सायन्सेसने त्यांना नोबेल पुरस्कारची घोषणा केली आहे.
१९८०च्या दशकात त्यांनी हे संशोधन केले होते. दशकापूर्वी केलेल्या संशोधनास नोबेल पुरस्कार क्वचितप्रसंगीच देण्यात येतो.
१० डिसेंबर रोजी पुरस्कार प्रदान करण्यात येणाऱ्या या पुरस्काराचे स्वरूप ८ दशलक्ष स्वीडिश क्रोनर (९.३६ हजार डॉलर किंवा ८.३४ हजार युरो) व पदक असे आहे.
आरबीआय द्वैमासिक पतधोरण
रिझर्व्ह बॅंकेचे गव्हर्नर ऊर्जित पटेल यांच्या अध्यक्षतेखालील सहा सदस्यीय समितीच्या पहिल्याच पतधोरणात रेपो दरात ०.२५ टक्क्यांची कपात केली.
नवा रेपो दर ६.२५ टक्के इतका असेल. यापूर्वीच्या पतधोरणातही रिझर्व्ह बॅंकेने रेपो दरात पाव टक्क्यांची कपात केली होती.
या दरकपातीमुळे गृहकर्जासह इतर कर्जे स्वस्त होण्याची शक्यता आहे. त्याचबरोबर बॅंकांमधील मुदतठेवींवरील व्याजही कमी होऊ शकते.
याचसोबत रिझर्व्ह बॅंकेचा रिव्हर्स रेपो दर ५.७५ टक्के इतका करण्यात आला असून, बॅंक रेट ६.७५ टक्के ठेवण्याचा निर्णय पतधोरण समितीने घेतला आहे.
पतधोरण समितीच्या सर्व सहा सदस्यांनी रेपो दरात कपात करण्याच्या बाजूने मतदान केले.
रिझर्व्ह बॅंकेचे यंदाचे पतधोरण अनेक कारणांनी महत्त्वाचे होते. यापूर्वी मध्यवर्ती बॅंकेच्या गव्हर्नरांनी व्याजदर निश्चितीबाबत अंतिम अधिकार होते.
यंदा मात्र पतधोरणाकरिता सरकारने सहा सदस्यांची नियुक्ती केली असून, तिचे अध्यक्षपद गव्हर्नरांकडे देण्यात आले आहे.
व्याजदराबाबत गव्हर्नर वगळता समितीतील अन्य पाच सदस्यांना निर्णय घेण्याचे अधिकार आहेत. गव्हर्नरांना केवळ अधिक मतांच्या बाजूनेच कौल द्यावयाचा आहे.
दृष्टिक्षेपात पतधोरण :
रेपो दरात ०.२५ टक्क्यांची कपात
रेपो दर ६.२५ टक्के, तर रिव्हर्स रेपो दर ५.७५
कॅश रिव्हर्स दरात (सीआरआर) बदल नाही (४ टक्के)
संगीत नाटक अकादमी पुरस्कार
ज्येष्ठ संगीतकार पं. हृदयनाथ मंगेशकर, नेपथ्यकार प्रदीप मुळ्ये, नाटककार शफाअत खान यांच्यासह लावणी नृत्यांगना छाया व माया खुटेगावकर यांना संगीत नाटक अकादमी पुरस्कार प्रदान करण्यात आले.
लेखिका व समीक्षिका शांता गोखले यांना अकादमीची शिष्यवृत्ती प्रदान करण्यात आली.
केंद्रीय सांस्कृतिक मंत्रालयाच्या वतीने राष्ट्रपती भवनात आयोजित कार्यक्रमात राष्ट्रपतींच्या हस्ते २०१५चे संगीत नाटक अकादमी पुरस्कार व शिष्यवृत्ती प्रदान करण्यात आली.
यावेळी विविध श्रेणींत देशातील ३९ नामवंत कलाकारांना त्यांच्या योगदानासाठी संगीत नाटक अकादमी पुरस्काराने गौरविण्यात आले, तर ३ मान्यवरांना शिष्यवृत्ती प्रदान करण्यात आली.
पुरस्काराचे स्वरूप १ लाख रुपये रोख आणि ताम्रपट असे आहे, तर शिष्यवृत्ती स्वरूपात ३ लाख रुपये प्रदान करण्यात आले.
प्रसिद्ध संगीतकार, गायक व महाराष्ट्राचे भावगंधर्व पं. हृदयनाथ मंगेशकर यांच्या सुगम संगीत क्षेत्रातील योगदानासाठी हा पुरस्कार प्रदान करण्यात आला.
‘उंबरठा’, ‘जैत रे जैत’ यांसह अनेक मराठी व ‘धनवान’, ‘मशाल’ अशा बऱ्याच हिंदी चित्रपटांचे संगीत दिग्दर्शन त्यांनी केले.
प्रसिद्ध नेपथ्यकार प्रदीप मुळ्ये यांना नाट्य क्षेत्रातील त्यांच्या उल्लेखनीय योगदानासाठी हा पुरस्कार प्रदान करण्यात आला.
‘वाडा चिरेबंदी’, ‘प्रपोजल दोन’, ‘स्पेशल’ अशा अनेकानेक नाटकांचे उत्तम नेपथ्य त्यांनी केले आहे.
नाटय़ लेखनातील वैविध्यपूर्ण शैलीतून नाटक क्षेत्रात मोलाचे योगदान देणारे नाटककार शफाअत खान यांना पुरस्कार देऊन सन्मानित करण्यात आले.
‘ब्लॅक कॉमेडी’ या दुर्मीळ नाटय़ लेखन प्रकारावर हुकमत असणारे नाटककार म्हणून शफाअत खान प्रसिद्ध आहेत.
‘राहिले दूर घर माझे’, ‘शोभायात्रा’ अशी अनेकानेक नाटके लिहून त्यांनी नाटय़ क्षेत्रात मोलाचे योगदान दिले.
महाराष्ट्रातील लावणी लोकनृत्याचा प्रचार व प्रसार करण्यात मोलाचे योगदान देणाऱ्या प्रसिद्ध लावणी नृत्यांगना छाया व माया खुटेगावकर यांना लावणी नृत्यातील उल्लेखनीय योगदानासाठी या पुरस्काराने गौरविण्यात आले.
ललित कला व नाटय़ समीक्षा क्षेत्रातील उल्लेखनीय योगदानासाठी लेखिका व समीक्षिका शांता गोखले यांना संगीत नाटक अकादमीची शिष्यवृत्ती प्रदान करण्यात आली.
रूपा गांगुली यांची राज्यसभेवर नियुक्ती
अभिनेत्री व भाजपच्या नेत्या रूपा गांगुली यांची राज्यसभेवर नियुक्ती करण्यात आली आहे.
नव्वदच्या दशकामध्ये दूरदर्शनवर गाजलेल्या ‘महाभारत’ मालिकेमध्ये त्यांनी द्रौपदीची भूमिका साकारली होती.
माजी क्रिकेटपटू नवज्योतसिंग सिद्धू यांनी दिलेल्या राजीनाम्यानंतर राज्यसभेतील ही जागा रिक्त झाली होती.
पश्चिम बंगालमध्ये नुकत्याच झालेल्या विधानसभा निवडणुकीत रूपा गांगुली भाजपच्या उमेदवार होत्या. मात्र, त्या क्रिकेटपटू लक्ष्मीरतन शुक्ला याच्याकडून पराभूत झाल्या होत्या.
नव्वदच्या दशकांत त्यांनी काही हिंदी व बंगाली चित्रपटांतही भूमिका केल्या होत्या.
कोणत्याही टिप्पण्‍या नाहीत:
टिप्पणी पोस्ट करा