चालू घडामोडी : ३० ऑक्टोबर
भारताला आशियाई चॅम्पियन्स हॉकी स्पर्धेचे विजेतेपद
- भारताच्या पुरुष हॉकी संघाने पारंपरिक प्रतिस्पर्धी असलेल्या पाकिस्तानला हरवत आशियाई चॅम्पियन्स करंडक हॉकी स्पर्धेत विजेतेपद पटकावले.
- अत्यंत थरारक झालेल्या अंतिम सामन्यात भारतीय पुरुष हॉकी संघाने पाकिस्तानचा ३-२ असा पराभव केला.
- बचावातील काही चूका सोडल्या, तर भारताचे वर्चस्व सहज जाणवणारे होते. भारतीयांनी सुरवातीपासून आक्रमक खेळ करीत पाकवर दडपण आणले.
- विशेष म्हणजे संपूर्ण स्पर्धेत अपराजित राहिलेल्या टीम इंडियाने आपल्या लौकिकानुसार खेळताना दुसऱ्यांदा चॅम्पियन्स ट्रॉफी उंचावली आहे.
- २०११मध्ये भारताने पाकिस्तान पेनल्टी शूटआऊटमध्ये हरवून पहिल्याच आशियाई चॅम्पियन्स स्पर्धेत बाजी मारली होती. त्यानंतरच्या दोन्ही स्पर्धा पाकने जिंकल्या होत्या.
- २०१२साली पाकिस्तानने भारताला तर २०१३साली यजमान जपानला नमवून आशियाई चॅम्पियन बनला होता.
- या वर्षांत भारताला सुल्तान अझलन शाह आणि चॅंपियन्स कंरडक स्पर्धेच्या अंतिम फेरीत उपविजेतेपदावर समाधान मानावे लागले होते.
अंटार्क्टिक महासागरात जगातील सर्वांत मोठे सागरी उद्यान
- अंटार्क्टिक महासागरात जगातील सर्वांत मोठे ‘रॉस सी सागरी उद्यान’ तयार करण्यास २४ देश आणि युरोपियन युनियनने तयारी दर्शविली आहे.
- महासागराच्या एकूण १.५५ दशलक्ष चौरस किलोमीटर परिसरात हे भव्य उद्यान असेल.
- या सागरी उद्यानामुळे या भागातील दुर्मिळ प्रजातींचे सुमारे ३५ वर्षे तरी व्यापारी मच्छीमारांपासून संरक्षण होईल.
- या भागात १.१ दशलक्ष चौरस किलोमीटर परिसरात मासेमारीला पूर्ण बंदी असेल. जे पेंग्विन, व्हेल, समुद्र पक्षी, प्रचंड असे जलचर, अशा दहा हजार प्रकारच्या प्रजातींचे घर आहे,
- येथील काही भाग संशोधनासाठी राखून ठेवण्यात येणार आहे. सागरी वैविध्याच्या संरक्षणासाठी जागतिक पातळीवर होत असलेल्या प्रयत्नांच्या दृष्टीने हा ऐतिहासिक निर्णय आहे.
- रॉस समुद्र हा पर्यावरणाच्या दृष्टीने जगातील एक महत्त्वाचा समुद्र आहे. महासागराच्या दक्षिण भागातील १२ टक्क्यांपेक्षा अधिक भाग या उद्यानाने व्यापला जाईल.
कंबोडियाचे माजी पंतप्रधान पेन सोवान यांचे निधन
- कंबोडियातील ख्मेर राजवटीला विरोध करून प्रथमच पंतप्रधानपदावर विराजमान झालेल्या पेन सोवान यांचे २९ ऑक्टोबर रोजी निधन झाले.
- पेन सोवान हे कंबोडियातील हुकूमशाही राजवटीनंतरचे पहिलेच पंतप्रधान होते. ते जून ते डिसेंबर १९८१पर्यंत पंतप्रधान पदावर होते.
- त्यावेळी कंबोडिया पीपल्स रिपब्लिक ऑफ काम्पुचिआ या नावाने ओळखले जात असे.
- कंबोडियामधील व्हिएतनामचे सैन्य माघारी घेण्याची मागणी केल्याबद्दल त्यांना पदावरून हटवण्यात आले होते. तसेच त्यांना १० वर्षे हनोईमध्ये तुरुंगवासात ठेवले होते.
- पेन सोवान यांनी कंबोडियन नॅशनल सस्टेनिंग पार्टी नावाच्या पक्षाची स्थापना केली होती.
- त्यांनी १९९८च्या निवडणुकीमध्ये भाग घेतला. मात्र त्यांना निवडणुकीमध्ये अपयश आले.
- त्यांनी २०१२मध्ये कंबोडिया नॅशनल रेस्क्यू पार्टी या विरोधी पक्षामध्ये प्रवेश केला आणि त्यानंतर ते २०१३च्या सार्वत्रिक निवडणुकीमधून जिंकून आले.
कोणत्याही टिप्पण्‍या नाहीत:
टिप्पणी पोस्ट करा