टोकियो ऑलिम्पिकसाठी पात्रता ठरलेल्या अंजूम आणि अपूर्वी या भारताच्या पहिल्या दोन नेमबाज ठरल्या आहेत.
नियमानुसार निवड चाचणी आणि विविध आंतरराष्ट्रीय स्पर्धांमधील सर्व नेमबाजांची कामगिरी लक्षात घेऊन ऑलिम्पिकमध्ये कोणाला पाठवायचे याचा अंतिम निर्णय भारतीय राष्ट्रीय रायफल संघटना घेणार आहे.
टोकियोतील स्पर्धेसाठी पात्रता मिळवण्यासाठीची आयएसएसएफची ही पहिलीच नेमबाजी स्पर्धा होती.
रॅपिड ट्रायडंट : युक्रेन, अमेरिका व इतर नाटो देशांचा युद्धसराव
युक्रेन देशाने २ ते १५ सप्टेंबर दरम्यान अमेरिका व ‘नाटो’ संघटनेच्या अन्य देशांसह रॅपिड ट्रायडंट (Rapid Trident) या संयुक्त लष्करी सरावाचे आयोजन केले आहे.
हायब्रीड युद्धातील सशस्त्र हल्ल्यांचा प्रतिकार करण्याचा सराव करणे, हा या युद्धाभ्यासाचा प्रमुख उद्देश आहे.
ब्रिटन, कॅनडा, जॉर्जिया, तुर्की, पोलंड आणि जर्मनी यासह १४ देशांमधील सुमारे २२०० अनुभवी सैनिक या सरावात सहभाग घेणार आहेत.
या सरावादरम्यान सशस्त्र वाहने, विमानांची पथके तसेच ३५०हुन अधिक लष्करी साहित्याचा वापर करण्यात येणार आहे.
गंगा नदी जगातील सर्वात संकटग्रस्त नद्यांपैकी एक
वर्ल्ड वाईड फंड फॉर नेचरच्या (डब्ल्यूडब्ल्यूएफ) अहवालानुसार, गंगा ही नदी जगातील सर्वात संकटग्रस्त नद्यांपैकी एक आहे.
प्रदुषणामुळे गंगा नदीची अवस्था अतिशय वाईट आहे. गंगा नदी ऋषिकेशपासूनच प्रदुषणाच्या विळख्यात सापडली आहे.
गंगा नदी ज्या भागातून वाहते, त्या भागातील बहुतांश ठिकाणी शौचालयांची स्थिती दयनीय आहे. अनेक ठिकाणी लोक उघड्यावर शौचास जातात. यामुळे नदी प्रदूषित होते.
कानपूरपासून ४०० किमी अंतरावर गंगा सर्वाधिक प्रदूषित आहे. गंगा नदीच्या किनाऱ्यांवर अनेक वीजनिर्मिती प्रकल्प आहेत. या प्रकल्पांमधील रसायनयुक्त पाणी थेट नदीत सोडले जाते.
याशिवाय अनेक कारखान्यांमधील प्रदूषित पाणी कोणत्याही प्रक्रियेशिवाय थेट नदीत सोडले जाते. त्यामुळे गंगा नदी प्रचंड प्रदूषित झाली आहे.
गंगा नदी उत्तराखंड, उत्तर प्रदेश, बिहार, झारखंड, पश्चिम बंगालमधून वाहते. या सर्वच राज्यांमध्ये नदीची स्थिती अतिशय वाईट आहे.
केंद्र सरकारकडून नमामि गंगे या उपक्रमातून गंगा नदीच्या स्वच्छतेसाठी कोट्यवधी रुपये खर्च केले जात आहेत. मात्र तरीही गंगा नदीची परिस्थिती बदलेली नाही.
देशात २०७१ किमी लांबीची गंगा नदी उत्तराखंडमध्ये उगम पावते आणि बंगालच्या उपसागराला जाऊन मिळते.
ऐतिहासिक, सांस्कृतिक आणि धार्मिकदृष्ट्या अनन्यसाधारण महत्त्व असणाऱ्या गंगा नदीमुळे १० लाख चौरस किमी क्षेत्रात शेती केली जाते.
राम सुतार उभारणार डॉ. बाबासाहेब आंबेडकरांचे स्मारक
दादरच्या चैत्यभूमीजवळील इंदू मिलच्या जागेतील डॉ. बाबासाहेब आंबेडकर यांचे स्मारक उभारण्याची जबाबदारी महाराष्ट्र सरकारने प्रसिद्ध मूर्तिकार पद्मश्री राम सुतार यांच्यावर सोपवली आहे.
डॉ. बाबासाहेब आंबेडकर यांचा हा जगातील सर्वांत उंच पुतळा असेल. त्याची उंची सुमारे ३५० फूट असणार आहे.
इंदु मिलच्या १२.४ एकर जमिनीवर ४२५ कोटी रुपये खर्च करून आंबेडकरांचे स्मारक उभारण्यात येत आहे. २०१५मध्ये पंतप्रधान नरेंद्र मोदी यांनी या स्मारकाचे भूमिपूजन केले होते.
ही जमीन पूर्वी केंद्र सरकारच्या ताब्यात होती. गेल्यावर्षी केंद्र सरकारने ही जमीन महाराष्ट्र सरकारला हस्तांतरित केली.
अरबी समुद्रात उभारण्यात येणाऱ्या छत्रपती शिवाजी महाराज यांचे स्मारक आणि गुजरातमधली सरदार वल्लभभाई पटेल यांचा पुतळा उभारण्याचेही काम राम सुतारच पाहत आहेत.
पाकिस्तान क्रिकेट बोर्डाच्या चेअरमनपदी एहसान मणी
आंतराष्ट्रीय क्रिकेट समितीचे (आयसीसी) माजी अध्यक्ष एहसान मणी यांची ३ वर्षांसाठी पाकिस्तान क्रिकेट बोर्डाच्या चेअरमनपदी निवड झाली आहे.
आतापर्यंत या पदावर नजाम सेठी विराजमान होते. २१ ऑगस्टला त्यांनी आपला पदभार सोडला.
पेशाने लेखापरीक्षक (सीए) असलेल्या मणी यांना प्रशासकीय कामकाजाचा अनुभव असल्याने त्यांना या पदी नियुक्त करण्यात आले आहे.
१९८९ ते १९९६ या काळात त्यांनी पाकिस्तानचे आयसीसीमध्ये प्रतिनिधित्व केले. त्यानंतर २००३साली त्यांची आयसीसीच्या अध्यक्षपदी नियुक्ती करण्यात आली होती.
कोणत्याही टिप्पण्‍या नाहीत:
टिप्पणी पोस्ट करा